Bya Francis Ndugwa
Bulange -Mmengo
Obwakabaka bwa Buganda busunsudde abayizi abaateekayo okusaba kwabwe okufuna bbasale nga bayita mu kitongole kya Kabaka Education Fund basobole okweyongerayo n’emisomo gyabwe.
Enteekateeka eno eyindidde ku mbuga enkulu e Bulange e Mmengo ku Lwokutaano ng’ebula mbale okusoma kuddemu oluvannyuma lw’emyaka 2 miramba ng’abayizi tebasoma olw’ekirwadde kya Ssennyiga Corona.
Kamisona mu Minisitule y’ebyenjigiriza, Ndugwa Badru Musoke y’akuliddemu enteekateeka eno ebaddemu okugezesa abayizi era agambye nti kino bakikola okukakasa nti abayizi abaweereddwa omukisa guno beebo bennyini abasaanidde okuweebwa bbasale era babasunsula okukakasa nti ebibakwatako bituufu.
Ndugwa agamba nti abaana ebbanga lye bamaze nga batudde waka wabaddewo obwetaavu bw’okubabudaabuda n’okubabulira okubateekateeka obulungi nga tebannadda ku masomero kuba ekiseera kibadde kiwanvu ng’abaana tebasoma.
Ndugwa Musoke annyonnyodde nti okusinziira ku bbanga abayizi lye bamaze nga tebasoma, bangi enneeyisa, n’endabamu ey’ebintu yakyuka nga beetaaga okuzibula amaaso.
Mu nteekateeka eno, abayizi n’abazadde abaweereddwa bbasale beebazizza Ssaabasajja olw’okufaayo ku bantu ba wansi nga ne mu kiseera kino ekyokudda ku masomero abajjukidde era ne bawera okukola kyonna okubeera aboomugaso.