Bya Ssemakula John
Bulange – Mmengo
Obwakabaka bwa Buganda buwadde bantu amagezi balemere ku kulima era basoosowaze ebirime eby’embala ng’ emmwaanyi nebirala bwebaba baagala okugoba obwavu.
Obubaka buno bubaweereddwa Omukubiriza w’Olukiiko lwa Buganda, Owek. Patrick Luwaga Mugumbule bw’abadde atikkula Oluwalo lwa bukadde obusobye mu 27 okuva mu ggombolola ezivudde e Buddu ku Lwokubiri e Bulange e Mmengo.
Omukubiriza Luwaga Mugumbule abalaamidde okulima emmwaanyi ezirongooseddwamu kuba zino zisobola bulungi okubala okusinga zinnansangwa abalimi nebasobola okufunamu nabasaba zino okuzirima nga batabikamu ebitooke basobole okufuna emmere gyebalya.
Abasabye bulijjo okuleeta abaana abato bongere okumanya ensonga za Buganda, Obwakabaka busobole okuggumira.
Owek. Mugumbule abakuutidde okwekuuma nga balamu bulungi era bafube okwelabirira obulungi kuba Ssaabasajja Kabaka abantu be abaagala nga balamu olwo lwebajja okutwala Buganda mu maaso.
Ye Minisita wa Gavumenti Ez’ebitundu mu Buganda, Owek. Joseph Kawuki akubiriza Banabuddu okunnyikiza obukozi basobole okwekulaakulanya ate ne Buddu eyongere okuyitimuka.
Bbo Abaami b’Eggombolola ezenjawulo abakiise embuga beebaziza Obwakabaka era nebaloopa embuga okusoomozebwa kwebayitamu kyokka bagamba nti kuno tekubalemeseza kuweereza Beene nakutuukiriza buvunannyizibwa bwabwe.
Mubakiise embuga mubaddemu abakulembeze ba Beene ku mitendera egyenjawulo mu Ggombolola zino , abakulembeze mu Gavumenti eyawakati nabantu abalala era bano bebaziza Obwakabaka olw’enteekateeka z’enkulaakulana eri abantu nebawera okusigala nga bamuweereza.
Eggombolola ezikiise embuga kubaddeko; Mutuba II Bukulula, Mukiise Mukungwe , Mutuba VI Katwe ne Mutuba VIII Kasaali nga zireese Oluwalo lwa bukadde 27 mu mitwalo 89 ne nusu 400 okuva ewa musaayi muto Andrew Ssekidde.