Bya Samuel Stuart Jjingo
Namirembe – Kyaddondo
Obwakabaka bukubirizza abafumbo okubeera abanyiikivu mu mirimu gye bakola okusobola okuwa eky’okuyiga eri abaana abato abali gye bakakkalabiza emirimu gyabwe.Obubaka
Obubaka buno Omumyuka Owookubiri owa Katikkiro era Omuwanika wa Buganda Owek. Robert Waggwa Nsibirwa abuwadde bw’abadde yetabye mu kusaba kw’okwebaza Katonda okla “Dean” w’e Namirembe The Very Rev. Can. Dunstan Kiwanuka Mazinga okuweza emyaka emyaka 25 mu bufumbo ne mukyala we Rev. Can. Lovincer Nalusiba Kiwanuka ku Lutikko y’Omutukuvu Pawulo e Namirembe.
Oweek. Waggwa agamba nti abantu bazze mu kusaba kuno okuwa obujulizi ku bibaddewo wakati w’abajaguza ababiri bano mu bufumbo bwabwe obujjudde ebyokulabirako enkumu naddala wonna we babadde baweerereza.
Oweek. Nsibirwa era agamba nti abajaguza bano abalabidde ebbanga era abeebazizza nnyo olw’okubeera ekyokulabirako eri abaana baabwe. Abeebaziza olw’okubeera nti mu myaka gino gyonna balina abantu be bakuteko naddala okubeera nga kati abasinga bafumbo.
“Namanya Can. Lovincer ng’akyasumba abaana bange e Gayaza High School era bawala bange bonna bamuwaddeko obujulizi olw’engeri gye yabasumbamu mu bukakkamu n’obwetowaze. Nneebaza Dean olw’omulimu gwe yakola mu baana abalenzi ku Mengo SS okubagyamu ekyejo ne bafuuka ab’omulamwa” Owek. Nsibirwa.
Owek. Waggwa yebazizza nnyo Can. Mazinga olw’okubeera omuntu alemera ku nsonga gy’ayagala egguke era wano anokoddeyo omulimu gwe yakola okunoonya ssente ezaddaabiriza Lutikko y’e Namirembe nga yawa entebya yaazo zonna awatali kwemulugunya kuva mu Bakristu.Akulembeddemu
Akulembedde mu okusaba kuno Omulabirizi w’e Namirembe Moses Bbanja yebaziza nnyo abagole bano olw’obutaswaza kkanisa awamu ne Ssaabalabirizi w’Ekkanisa ya Uganda okuva mu bufumbo ky’ayise eky’ettendo kubanga bakuumye ebirayiro byabwe era bawadde Katonda ekitiibwa okutuukiriza kino.
Omusumba Banja agamba nti abagumikiriza be batuuka ku ntikko mu bufumbo obujjudde ebintu eby’essanyu awamu n’okunyiga wabula bano bayise mu buli muyaga oguzzeewo mu bulamu bwabwe bw’atyo n’abasaba okusigala ku mulamwa guno lubeerera. Abajaguza bazzeemu okunyweza ebirayiro byabwe ne beyama okusigala nga babitambulirako okutuuka Mukama Katonda lwalibajjulula okuva ku nsi.
Abajjaguza bafumbiriganwa nga 30 Ntenvu mu mwaka gwa 2000 mu Lutikko ya St. Phillip’s and Andrew’s e Mukono era Ssaabalabirizi w’Ekkanisa ya Uganda the most Rev Dr Stephen Kaziimba Mugalu yeyali “Bestman” wa Canon Mazinga.
Okusaba kuno kwetabiddwako Okusaba kwetabiddwako Omukulembeze w’Ennono owa Ekumfi Otuam okuva mu ggwanga lya Ghana Charles Ebo Henry Woode, Omukubiriza w’Olukiiko lwa Buganda Olukulu Oweek. Patrick Luwaga Mugumbule, Ssaabalabirizi w’Ekkanisa ya Uganda the most Rev Dr Stephen Kazimba Mugalu, abalabirizi abawummula mu kkanisa ne bannaddiini ab’enjawulo, Omuk. John Fred Kazibwe, abakulu b’amassomero g’ekkanisa ag’enjawulo n’abantu abalala bangi nnyo.