Bya Jesse Lwanga
Kyaggwe
Obwakabaka bwa Buganda nga buyitira mu kitongole ky’ebyenjigiriza ekya Kabaka Education Fund awamu n’essaza ly’e Kyaggwe, badduukiridde omuyizi Amos Wambede ne bbasale enaamuyamba okumalako emisomo.
Kino kiddiridde taata wa Wambede era omuwagizi wa NRM okugaana okumuwerera ng’amulanga okuwangula munnakibiina kya NRM era ggwe yali anoonyeza akalulu mu kalulu akawedde.
Wano akulira ebyenjigiriza ku ssaza ly’e Kyaggwe, Steven Katabalwa w’asinzidde n’asaba abazadde okukomya eky’okukotoggera ebirooto by’abaana baabwe, wabula babayambeko okubitumbula basobole okubayamba mu bukadde bwabwe.
Katabalwa y’akwasizza Wambede ebbaluwa eno ku lw’ekitongole kya Kabaka Education Fund ku nsisinkano ebadde e Kyaggwe.
Wambede gye buvuddeko yavaayo n’alaajanira abazirakisa okumuyamba okumuzzaayo ku ssomero olwa kitaawe Moses Madanda eyagaanira ddala okuddamu okumuweerera olw’okwenyigira mu by’obufuzi.
Ye Omwami wa Ssaabasajja Kabaka atwala essaza ly’e kyaggwe, Ssekiboobo Elijah Bogere Lubanga Mulembya, agamba nti oluvannyuma lw’okusisinkana n’okubaako by’ayogera ne Wambede, yalaba obwetaavu bwe yalina ne basalawo okumuweerera, n’amusuubiza n’okumwongerayo okutuuka ku yunivaasite singa anaaba asomye bulungi.
Wambede yeebazizza Obwakabaka bwa Buganda olw’obuyambi obwamuweereddwa era oluvannyuma ono akwasiddwa omukulu w’essomero lya Ntenjeru Parents gy’agenda okukakkalabiza emisomo gye.