Bya Ssemakula John
Kyengera – Busiro
Amyuka Pulezidenti w’ekibiina kya National Unity Platform (NUP) era akulira oludda oluwabula gavumenti mu Palamenti, Owek. Mathais Mpuuga Nsamba, ategeezezza nti ekibiina kya NUP si kyabakireereese nti bajja kumala gagoberera buli kimu awatali kusooka kwebuuza na kubikubamu ttooci, kuba balina ebigendererwa n’emiramwa kwe bakitambuliza.
Okwogera bino, Owek. Mpuuga abadde ayogerako bannamawulire ku Lwokuna e Kyengera ku nsonga lwaki ekibiina kya NUP kikyalemeddwa okwegatta ku mukago gwa IPOD ogutaba ebibiina ebirina ababaka mu Palamenti.
“NUP si kibiina kyabakireereese, tulina olugendo lwe tutambulira era olugendo olwo lulina ebigendererwa. Era buli mutendera gwe tutuukako twebuuza oba nga tutambudde bulungi, tuwenyegera, tubeteggera, tuli kuki, tuba tulina okutambula n’omulamwa. Ensonga ya IPOD tetugirinako buzibu kukolagana na kuwuliziganya kubanga eggwanga si lyaffe, eggwanga lya ffenna?” Owek. Mpuuga bw’agambye.
Owek. Mpuuga annyonnyodde nti wadde ekirowoozo kya IPOD kyaleetebwa abagabi b’obuyambi olw’obuzibu bw’okusika omuguwa n’okulyang’ana okwali mu ggwanga, naye kati yafuna ekizibu kuba waliwo abalowooza nti mukisa okufaananya bannaabwe be bavuganya nabo ng’abatalina makulu nga tewali mwagaanya kuteeka biteesebwako mu nkola.
Omubaka Mpuuga agasseeko nti wadde IPOD yalina obuvunaanyizibwa okulaba ng’okulonda tekubeeramu butabanguko, okulaba ng’ebibiina by’obufuzi bifuna ssente ssaako n’okusomesa abantu awamu n’okulaba ng’akakiiko k’ebyokulonda tekaba na kyekubiira naye ku bino byonna tewali kyakolebwa.
Ono agamba nti wadde ebibiina by’obufuzi bingi mu ggwanga era buli ludda lulina bwe lwagala eggwanga litambule naye waliwo empagi eziyimirirako eggwanga ezitalina kukyuka awatali ku kufaayo ani alina obuyinza, kuba bino bikkaanyizibwako ng’eggwanga.
Owek. Mpuuga agamba nti okwegatta ku IPOD, baagala abantu abakwatibwa olw’ebyobufuzi basooke bayimbulwe awatali bukwakkulizo
ku mbeera y’ebyokwerinda eri mu ggwanga, Owek. Mpuuga annyonnyodde nti ebiriwo tebiraga butebenkevu era nga waliwo n’abamenyi b’amateeka abatambulira mu by’obufuzi bya Uganda ebyakireebereebe,, n’asaba buli omu afune obuvunaanyizibwa yeekuume era yeekengere.