Bya Jesse Lwanga
Ekibiina kya National Unity Platform mu kibuga Mukono kyeyogedde okweriisa enkuuli bwe kikukumbye ebifo ebisinga obungi mu lukiko lwa Munisipaali eno nga bawagulidde ddala okuviira ddala ku ky’obwammeeya mu kulonda okwa Mmande ate NRM nefunayo ebifo bbiri byokka.
![](https://gambuuze.ug/wp-content/uploads/2021/01/gagagaa-1024x768.jpg)
Ekifo kya mmeeya kyawanguddwa abadde Ssentebe wa Goma Division, Erisa Mukasa Nkoyoyo owa NUP nga yafunye obululu 18088, yaddiriddwa munna NRM, Nabatanzi Daisy Sarah Ssonko 5126, Kaddu Christopher 2231, Kyamaggwa Stephen 1148, Sserugga Sirajje 974, Mulimira Micdad 907, Lugoloobi Daniel 763, Mpalanyi Christopher 190 ne Mutyaba Mathew 70.
Bano beekokkodde ebikolwa by’okwagala okugulirira abalonzi ssaako n’okutiisibwa be bagambye nti baabadde ba NRM naye bakoze ekisoboka okuwagula.
Mu kwogerako gye bali, omubaka w’ekibuga kino, Hon. Betty Bakireke Nambooze asabye abaalondeddwa okukola ekibalondesezza kuba omupiira guli mu ngalo zaabwe nga basaanye okukola ku ebizibu ebiruma abantu.
Okulonda we kwaggweeridde nga NRM erinayo abakiise 5 nga 2 baliko obulemu, 2 bakadde.