Bya Francis Ndugwa
Bulange – Mmengo
Nnaabagereka Sylvia Nagginda asabye abakyala okwewala okuzaalira okumukumu kibayambe okutegeera abaana bebazaala n’okubategekera obulungi.
Bino Nnaabagereka abyogeredde mu Ssaza Bulemeezi bwabadde yeetabye ku bijaguzo by’olunaku lw’ abakyala mu Buganda egiyindidde e Ssemuto mu Bulemeezi ku Lwokusatu.
Nnaabagereka Nagginda mu Ssaza Bulemeezi atuuseeyo ku ssaawa nnya nekitundu ez’okumakya nayanirizibwa wakati mu mbuutu okuva mubaana bamasomero.
Ono ategeezezza nti kikulu okuteeka essira ku byobulamu byabantu basobole okubeera abalamu.
Maama Nnaabagereka asookedde kuddwaliro lya Semuto Health centre IV nayanirizibwa Kangawo Eng Ronald nabakulembeze abalala mu Ssaza Bulemeezi era agemye abaana basatu abazaaliddwa mukiro ekikeesezza olwaleero.
Bwavudde awo asimbye omuti ogwekijjukizo ku ddwaliro noluvannyuma nawebwa ebirabo ebivudde mu lusuku lwa Nabagereka mu kitundu kino e kye Semuto
Oluvannyuma ayolekedde mu maka g’omukyala Robina Nabanja nga gano kyakulabirako eky’amaka amalungi akaalo amatendo nalambuzibwa ebintu ebyenjawulo olumaze naayolekera ekisaawe ewategekeddwa omukolo.
Ye Minisita wa Bulungibwansi, Owek. Hajjat Mariam Mayanja Nkalubo Nassejje akubirizza abakyala okwongera okukolera awamu era bafube okulima ennyo emmwanyi beegobeko obwavu.
Akulira abakyala mu Buganda, Agnes Kimbugwe wamu ne Florence Nassanga akulira abakyala mu Ssaza Bulemeezi beeyamye okwongera okubeera abawulize eri Obwakabaka nokwongera okugunjula abaana b’eggwanga.
Kkangawo Eng Ronald Mulondo ategeezezza nti essaza lino lisoosowaza abakyala mubuli kimu era akubirizza abakyala nabo okwongera amaanyi mubyebakola naye nalaga okutya olw’omuze gw’okukabasanya abakyala oweyongera buli lukya mukitundu kino.
Omukolo guno gwetabiddwa abakulembeze ab’enjawulo okuva mu Bwakabaka, Palamenti ne Disitulikiti ye Luweero.