Bya Doreen Nakajiri
Kampala
Nnaabagereka Sylvia Nagginda asabye abayizi abeetabye mu Ekisaakaate Online 2020 okunyweza obuntu bulamu, kibayambe mu biseera byomumaaso.
“ Sabiiti eyise muyize obuntu bulamu era tusuubira nti mujja kwekwata ku miramwa gyemuyize. Gino mulimu okubeera ab’ekisa, okuwangana ekitibwa, obuvunanyizibwa obw’ensimbi n’emirala,” Nnaabagereka bweyanyonyodde.
Okusaba kuno Nnaabagereka yakukoledde ku Sanga Courts mu Kampala ku Lwokutaano ng’ ayogeraganya n’abayizi mu mawanga ag’enjawulo ku mutimbagano gwa ZOOM mu Ekisaakaate Diaspora 2020.
Maama Nagginda yakubiriza abayizi okwogera ennimi zaabwe ennansi nga oluganda kibayambe okwekiririzzaamu. Yalaze okutya eri abazadde mu maka abatasobola kwogera nnimi zaabwe enzaaliranwa. Bano abasabye bagezeeko nga batandikira ku bigambo ebisokerwako.
Yajjukizza abayizi okwejjukanya ebyo byebayize baleme kubyerabira era nasiima abazadde olw’okuwaayo obudde nebayamba ku bayizi.
Yasuubiza okwongera okutegeka Ekisaakaate ku mutimbagano eri abaana abasomera mu International School nabali ebweru kubanga Ekisaakaate Gatonya wekibererawo bano babeera ku ssomero.
Yye senga Elizabeth Walugembe, yakubirizza abazadde okweyambisa enkola y’Ekisaakaate eya ‘LABA, KOLA, YIGA,’ basobole okukuza abaana nga balimu empeke.
Kinajjukirwa nti, Ekisaakaate Online 2020 kyatandise nga 17/08/2020 era nga kiyindidde ku mutimbagano okusobola okwewala ekirwadde ki ssennyiga Corona era nga kyetabyemu abaana okuva e Canada, Amerika, Kenya ne Uganda.
Ssenkulu wa Nnabagereka Development Foundation Andrew Adrian Mukiibi, asomesezza ku bwetaavu bw’okulaga abaana eddembe lyabwe n’obuvunanyizibwa bwabwe kibayambe okweteekateeka obulungi.