Bya Ssemakula John
Kampala
Munnamateeka Muwada Nkunyingi alemeddeko ng’agamba ab’akakiiko k’ebyokulonda yabasabye mpapula zikwata ku buyigirize bwa Pulezidenti Yoweri Museveni so si kumunnyonnyolwa bigambo kuba amanyi gy’ayinza okubiggya bw’aba abyagala.
Nkunyingi, yawandiikira akakiiko k’ebyokulonda ng’ennaku z’omwezi 21 Owomunaana ng’akasaba okumuwa ebiwandiiko kwe kasinziira okusunsulamu Pulezidenti Museveni mu kalulu ka 2016 ng’etteeka erirung’amya okulondebwa kwa Pulezidenti (Presidential Elections Act 2005) bwe liragira.
Mu kuddamu okusaba kwe, Akakiiko k’ebyokulonda kaategeezezza ng’ebiwandiiko bya Pulezidenti Museveni bwe byali biteetaaga kuddamu kakasibwa.
Olwafunye okwanukulwa kuno Muwada n’ategeeza bannamawulre nti tasabangako bigambo kuva mu kakiiko k’ebyokulonda wabula yasaba ekintu kimu mpapula za Museveni ez’obuyigirize.
“Abakiiko k’ebyokulonda ebigambo bandibyesigaliza nze nebampa kye banabasabye.” Muwada bwe yategeezezza.
Akakiiko k’ebyokulonda kaanokoddeyo ekitundu nnamba 4 akatundutundu 15 ak’etteeka erirug’amya okulondebwa kwa Pulezidenti w’eggwanga akagamba nti, “Singa eyeesimbyewo abeera n’ebbaluwa ya Siniya eyoomukaaga nga yagifunira mu Uganda oba obuyigirize obusingako ku busabibwa mu mateeka nga yabuggya mu lyali ettendekero lya ‘University of East Africa oba amatabi gaalyo, tewajja kubaawo bwetaavu bwa kitongole ekirondoola amatendekero aga waggulu kumukakasa.”
Nkunyingi Muwada kino yakigaanye n’ategeeza nti ye ky’ayagala bye biwandiiko by’obuyigirize bwa Museveni ng’etteeka eriwa bannansi olukkusa okufuna amawulire ku kintu kyonna (Acess to Information Act,2005) bwerigamba.
“Etteeka erituwa olukkusa okufuna amawulire oba ebiwandiiko teritugaana kusaba bya Pulezidenti aliko, ffenna tulina okuyisibwa ekyenkanyi,” Nkunyingi bwe yalambuludde.
Muwada alumiriza nti munnamateeka Male Mabiriizi bwe yasaba ebiwandiiko bya Robert Kyagulanyi (Bobi Wine) akakiiko kaabimuweera mu nnaku nnya kyokka ye bwe yasabye ebya Museveni okumuddamu kumpi kibatwalidde omwezi mulamba.