Bya Ssemakula John
Kyambogo
Nancy Kalembe Linda kyaddaaki awandiisikiddwa ng’omu ku bagenda okuvuganya mu kalulu ka bonna ak’omwaka 2021 mu kisaawe kya Kyambogo University, oluvannyuma lw’okusasula ssente obukadde 20 ezaabadde zimulemye okusasula olunaku lw’eggulo.
![](https://gambuuze.ug/wp-content/uploads/2020/11/Kalembe.png)
Kalembe ne Katumba eggulo ku Mmande baalemeddwa okukakasibwa ssentebe w’akakiiko k’ebyokulonda olwobutabeera na lisiiti y’obukadde 20 ezibalagirwa okusasula mu mateeka.
Linda naye olwaleero akakiiko kamukakasizza era ng’ono addiridde Katumba mu kuwandiisibwa.
“Twekenneenyezza empapula za Nancy Kalembe Linda. Era Nze Omulamuzi Byabakama Mugenyi Simon nga nze nkuliddemu okuwandiisa abeesimbyewo, nangirira Nancy Klembe Linda ng’omu ku bantu abeesimbyewo ng’atuukirizza obukwakkulizo bwonna obwa ‘Presidential Elections Act,” Byabakama bw‘annyonnyodde.
Kalembe oluvannyuma lw’okukakasibwa alangiridde nga bw’agenda okuteekawo obukulembeze obulungi era obwesigamye ku buntubulamu. Ono asuubizza okuwa bannayuganda ebiseera by’omu maaso ebirungi beerabire ebikadde.
Ono ategeezezza nga bw’agenda okukwata ku nsonga y’ebyobulamu kubanga kino kye kimu ku bizibu ebimazeeko bannayuganda emirembe era akole nnyo okukyusa ebyenjigiriza bya Uganda, kisobole okukendeeza ku bbula ly’emirimu.
Kalembe nga ye mukyala yekka ali mu lwokaano luno, asabye bannayuganda okumuwagira ku lw’ebiseera bya Uganda eby’omu maaso naddala eri abakyala n’abavubuka nga bano be basinga okunyigirizibwa embeera eriwo mu ggwanga.