Bya Samuel Stuart Jjingo
Mmengo – Kyaddondo
Katikkiro Charles Peter Mayiga asabye abantu ba Beene obutenyigira mu kutyoboola butondebwansi ekiyinza okuba nga kye kiviiriddeko omusana omungi ensangi zino.
Bino bibadde mu bubaka bw’awadde Minisita w’Obulimi, Obulunzi, Obwegassi n’Obuvubi Oweek. Hajj Amisi Mukasa Kakomo bw’abadde atikkula oluwalo lwa bukadde 36 okuva mu Masaza 4; Buweekula, Buddu, Ssingo ne Mawogola.
Kamalabyonna agamba abantu ba Beene okwewala okutyoboola obutondebwensi, basaana bagoberere ennambika y’Obwakabaka ku kukuuma obutondebwensi bamanye ebirungi ebiri mu butondebwansi.
Owomumbuga era akubirizza abantu ba Kabaka okusoosowaza enteekateeka eziva mu Bwakabaka babinywererako zibayambe okwebbulula okugoba obwavu.
Minisita wa Gavumenti ez’Ebitundu Oweek. Joseph Kawuki asinzidde wano n’akubiriza abaami ba Kabaka ab’e ggombolola okufuba okulambika abantu mu bitundu byabwe ku kulonda kwa ba ssentebe b’ebyalo okusembedde, awatali kukulembeza bibiina bya byabufuzi, eddiini, oba amawanga. Agamba kikulu okulonda omukulembeze ategeera Kabaka ate nga agatta abantu aba buli ngeri.
Omugabe w’olunaku, Omwami wa Kabaka ow’essaza Buweekula,Luweekula Oweek. Ssempijja Andrew Mukasa, yeebazizza nnyo abaami b’e ggombolola olw’okunnyikiza enjiri y’Obwakabaka mu bantu ba bulijjo nga kati enteekateeka z’Obwakabaka zonna zitambula bulungi omuli; Ssemaduuka, kalakita n’ebirala nga bino biraga nti Obwakabaka butambula budda mu maaso.
Ggombolola nga bwezikoze okuva mu masaza: Buweekula; Ssaabaddu Butoloogo – 940,000, Ssaabagabo Kasambya – 2,170,000, Ssaabawaali Madudu – 3,600,000, Musaale Kiyuuni – 6,365,300, Mut.1 Kitenga – 3,455,000, Buddu; Mut. XVIII Kibinge – 11,450,000, Ssingo; Mut. XV Kikandwa – 6,000,000, Mawogola; Ssaabawaali Mijwala – 2,430,000 nga zonna awamu 36,410,300.