Bya Ronald Mukasa
Mmengo Kyaddondo
Kamalabyonna wa Buganda Charles Peter Mayiga alabudde abantu ba Beene ku ttamiiro erisukiridde, agamba nti okunywa omwenge ssi kikyamu kyokka kirina kukolebwa mu bipimo n’obudde obutuufu okwewala ebizibu ebyekuusa ku kutamiiruka omuli n’okwetaba mu bikolwa eby’obwenzi ebiviirako okusaasana kwa kawuka ka Siriimu.
Obubaka buno Katikkiro abuweredde mu Bulange Mmengo, mu nsisinkano ye n’atwala essogolero ly’omwenge mu kampuni eya Kakira distillers Patrick Pillay bw’abadde azze okwanjulira ebika by’omwenge bye bakola n’okunyweza enkolagana yaabwe n’Obwakabaka.
Katikkiro akuutidde abalimi b’emmwanyi okukozesa obulungi ensimbi ze bajja mu kulima emmwanyi, nga basomesa abaana okulongoosa empya zaabwe n’okutandikawo emirimu egitali gimu, wano era waasinzidde n’alabula abagoba b’ebidduka okwewala okuvuga nga batamidde okusobola okwerinda obubenje obuviiriddeko bangi okufiirwa obulamu.
Patrick Pillay okuva mu Madhivan agambye nti baasalawo okujja n’ekirowoozo eky’okuyiisa omwenge ng’emu ku ngeri y’okutaasaamu obutonde bwensi nga bakozesa ebyo ebiva mu bikajjo bye bakolamu sukaali.Agambye nti balina n’omwenge gwe bakola okuva mu mmwanyi ky’agambye nti kigenda kwongera ku katale k’emmwanyi naddala ezirimwa wano mu Uganda.
Ensisinkano eno yeetabiddwamu Minisita w’Olukiiko, Kabinenti n’Ensonga ez’enjawulo mu woofiisi ya Katikkiro Oweek Noah Kiyimba n’abantu abalala bangi.