Musasi waffe
Omukulembeze w’eggwanga Genero Yoweri Kaguta Museveni olwaleero eyongezzayo ennaku za kalantiini ne kafiyu okutuuka nga May 05.
Bwabadde ayogerako eri eggwanga mu maka g’obwapulezidenti e Nakasero, Museveni yategeezezza nti kyetaagisa okwongezaayo ennaku zino okusobola okwongera okutangira okusasaana kw’akawuka ka Coronaviru mu ggwanga.
Museveni yagambye nti bukyanga batandika kukebera bantu okuzuula oba balina akawuka, omuwendo gutuuse ku bantu 5664 nga kubbo, 54 bokka bebasangibwa n’ekirwadde kya coronavirus ekimanyiddwa ennyo nga COVID-19.
“Okuba n’abalwadde 54 bokka kitegeeza nti enkola gyetwateekawo ebadde ekoze bulungi. Naye nsaba Bannayuganda mweyongere okugumiikiriza okutaataaganyizibwa kuno pakka ng’ennaku zino ziweddeyo olwo tutandike okuta mpolampola,” Museveni bweyagambye.
Ekirwadde kya coronavirus kyakatta abantu abasoba mu mitwalo kkumi n’ebiri mu nsi yonna nga n’abakunnukiriza mu bukadde obubiri bamaze okusiigibwa.
Ng’ebyo bikyalyawo, Museveni alabudde abantu abakuba abasirikale amayinja n’agamba oyo yenna gwebanaakwatako kajja mujjuutuka.
Museveni yalagidde abasirikale bonna abalumbibwa nga tabalina bisseppewo by’okumutwe oba ebisowani ebiziyiza amayinja, okukuba abo ababakuba amayinja amasasi mu bifo ng’amagulu oluvanyuma babasibe.
“Okuba otya omusirikale amayinja, lwaki weeretera ebizibu,” Museveni bweyagambye.