Bya Ssemakula John
Entebbe
Pulezidenti Yoweri Kaguta Museveni akunze omukago gwa Bulaaya okukologana obulungi ne Uganda era bakimanye nti si balabe na balabe.
![](https://gambuuze.ug/wp-content/uploads/2021/02/ttt.png)
Enkolagana ya Uganda n’omukago gwa Bulaaya ezze esereba olw’ebyo ebyaliwo oluvannyuma mu kalulu ka 2021 akaawangulwa Pulezidenti Museveni okusinziira ku ebyo ebyafulumizibwa akakiiko k’ebyokulonda.
Kino kiddiridde Palamenti y’omukago gwa EU okusaba abakungu ba gavumenti ya Uganda okuteekebwako envumbo olw’ebigambibwa nti bano baalinnyirira eddembe ly’obuntu mu kalulu akawedde.
Ku kino gavumenti ya Uganda yavaayo n’erabula omukago gwa Bulaaya obutamala geeyingiza mu nsonga za Uganda kuba ggwanga eryetongodde.
Eggulo ku Lwokuna, bannamukago guno nga bakulembeddwamu Ambasada Attilio Pacifici,Per Lindgarde of Sweden, William Carlos (Ireland), Rudi Veestraeten (Belgium), Jules Armand Ania Mbossou (France), Nicolaj Itejberg Peterson (Denmark), Massimiliano Mazzanti (Italy), Mathias Schauer (Germany), Karin Boven (Netherlands) ne Dr Roswitha Kremser ( Austria), bakyaddeko mu maka g’Obwapulezidenti Entebbe ne boogera ku nsonga eziwerako.
Bwe yabadde ayogerako gye bali, Museveni bano yabategeezezza nti omukago gwa Bulaaya ne Uganda si balabe era basaanye okukola baganyule abantu baabwe ku njuyi zombi.
“Tetubalaba nga balabe, Muggyeewo ebituwugula mufeeyo ku ebyo ebitugatta era tuyambagane okulaakulana.” Museveni bwe yagambye.
Ono bannamukago guno abasabye okusookanga okwebuuza ku gavumenti ku ebyo bye balaba bitagenda bulungi era n’abalabula okweyingiza mu nsonga ze batamanyi kuba kino kijja basuula mu buzibu. Museveni eyasoose okubayitira mu byafaayo bya Uganda, bateesezza ku bintu ebyenjawulo omuli eby’obufuzi, ebyenfuna wamu n’embeera z’abantu.
“Bwe mweyingiza mu nsonga ze mutategeera ne bwe muba muzitegeera naye era temumala gazeeyingizaamu kuba kino kiyinza okuvaako abantu okubonaabona nga bwekiri mugamu ku mawanga ga Afirika.” Museveni bwe yannyonnyodde.
Ono yeeyamye okuzuula ekituufu ekyaliwo ku busambattuko bwa November 18 ne 19 mu kwekalakaasa ng’abawagizi b’ekibiina kya National Unity Platform bawakanya okukwatibwa kwa Robert Kyagulanyi. Ambasada Per Lindgarde owa Sweden yeeyamye okwongera okukolagana ne Uganda naddala ku kukulaakulanya y’abantu n’okusitula embeera zaabwe.
Ensisinkano eno yeetabiddwamu Ssaabaminsita Dr. Ruhakana Rugunda, Minisita w’ensonga z’ebweru Sam Kutesa awamu n’abakungu abalala.
Enkolagana ya Uganda n’amawanga g’abazungu buli lukya yeeyongera okubeera embi ng’oludda olumu lulumiriza Uganda okugaana okussa ekitiibwa mu ddembe ly’obuntu wabula gavumenti ekyagenda okulabula amawanga g’abazungu okukomya okweyingiza mu nsonga za Uganda.