![](https://gambuuze.ug/wp-content/uploads/2020/05/museveni-88.jpg)
Musasi waffe
Omukulembeze w’eggwanga Yoweri Kaguta Museveni eggulo lyaleero alagidde buli muntu yenna obutava waka okujjako ng’ayambadde masiki okubikka emimwa n’enyindo okutangira ensaasaana y’ekirwadde kya coronavirus.
“Akawuka tekalina biwawaatiro kubuuka n’olwekyo mulina okwambala masiki muleme okukasaasanya singa oba ng’okalina,” Museveni bweyagambye.
Mungeri yemu Museveni era yakkiriza bizinensi ezimu okuddamu okukola.
Muzakkiriziddwa mulimu, amaduuka agatunda ebikozesebwa mu kuzimba, galagi awakanikibwa emmotoka, amaduuka agatunda mu bungi, ebizimbe omuterekebwa eby’amaguzi ziyite warehouses, amakampuni ga yinsuwa, ebirabo by’emmere wamu ne bannamateeka 30 gokka nga bakulondebwanga ekibiina ekibagatta ekya Uganda Law Society.
Kyokka Museveni yaganye okuggulawo entambula y’obwannanyini wamu ne y’olukale ng’agamba nti embeera tennaterera.
Abo abakkiriziddwa okuddamu okukola Museveni yagambye baakutambuliranga mu bbaasi oba okuvuga obugaali oba okutambuza ebigere.
Ku bayizi b’amasomero, Museveni yagambye nti ekiseera tekinnaba kutuuka eky’okuddayo kubanga embeera ekyali mbi.
“Nfundako bazzukulu bange obukadde 15 okufiirwa taamu emu oba omwaka gwonna okusinga okubaweereza mu masomero ate netwejjusa olw’obutaba bagumiikiriza,” Museveni bweyagmbye.
Uganda erimu abantu 89 abamanyiddwa okubeera n’ekirwadde kya coronavirus kyokka nga kubbo abasoba mu 50 bamaze okuwona.