Bya Ssemakula John
Kampala
Pulezidenti Yoweri Kaguta Museveni era Ssentebe w’ekibiina kya National Resistance Movement (NRM), alabudde ababaka abalonde naddala mu kibiina kye obutagezaako kwonoonera ssente za muwi wa musolo mu kwejalabya nga bagenda emitala w’amayanja.
Museveni bino abitegeezezza abamu ku babaka abalonde aba NRM bw’abadde abasisinkanye e Kyankwanzi leero ku Lwokuna okubaako bye bawayaamu.
“Enkola eno ey’ababaka okugenda ebweru okulaba abaayo bwe batambuza ebintu, bulyi bwa nguzi bwennyini.” Museveni bw’agambye.
Ono abalabudde nti ababaka ba NRM ku mulundi guno bandyewaze okulwanagana naye ku nsonga yonna kuba mwetegefu ebitagambika.
“Ebiseera ebimu saagala kuswaza bantu bange aba NRM, nsalawo okwogera obwogezi nabo nga ndowooza nti banaakyusaamu naye bamaliriza ffenna batuzingiddemu olw’ensobi zebakola. Tekikola makulu okwonoona ssente z’eggwanga mu kutambula ebunaayira.” Pulezidenti Museveni bw’annyonnyodde.
Museveni awadde ekyokulabirako kya eyali Pulezidenti wa Tanzania, John Pombe Magufuli, eyasalawo okusala ku ng’endo z’ababaka be okugenda ebweru ne kiyamba okukendeeza ku nsimbi ezisaasaanyizibwa.
Abawadde amagezi okukomya okutunuulira ensimbi naye bafeeyo nnyo ku bizibu ebiruma abantu ng’okubagobako obwavu.
Gyebuvuddeko Museveni yalabula ababaka mu Palamenti y’e 11 nga bw’atajja bakkiriza kwegabira musimbi awamu n’emmotoka.
Museveni enkya asuubirwa okusomesa ababaka bano ku mutindo gw’obukulembeze gwe balina okubeera nagwo.