Bya Ssemakula John
Mukono
Avuganya ku bwapulezidenti ku kkaadi ya National Resistance Movement (NRM), Yoweri Kaguta Museveni, ategeezezza nti teyasanyukidde kiragiro kya kakiiko ka byakulonda ekiyimiriza enkung’aana ne kkampeyini mu bitundu ebimu okutangira ekirwadde kya Ssennyiga Corona.
![](https://gambuuze.ug/wp-content/uploads/2020/12/Museveni-1024x576.jpg)
“Nze sikubangako ku nkung’aana naye akakiiko k’ebyokulonda kantadde wamu ne Kyagulanyi, naye Katonda abalaba.” Museveni bw’agambye ng’ali e Mbalala mu Mukono olwaleero bw’abadde atongozza ekifo ekigenda okubunyisa amasannyalaze.
“Tusisinkana bakulembeze bokka era bwe tusisinkana abawagizi tetufuluma naye olwokuba ye ssentebe w’akakiiko Byabakama alagidde, tujja mugondera.” Pulezidenti Museveni bw’agasseeko.
Museveni wadde emabegako abadde ayambala ssaati za kyenvu ez’ekibiina kye, leero abadde mu ssuuti.
“Leero nninga mukungu era sisuubira nti waliwo anaagamba nti nkoze kkampeyini, Byabakama mumugambe nti twalabye omusajja afaanana abakozi b’ekibiina kya UN,” Museveni bw’annyonnyodde.
Kino kiddiridde akakiiko k’ebyokulonda ku Lwomukaaga, okuwera kkampeyini mu disitulikiti 11 okuli; Masaka, Kampala ne Wakiso, olwa Ssennyiga Corona eyeeyongedde ennyo mu bitundu bino.
Okusinziira ku mwogezi w’akakiiko kano, Paul Bukenya, kkampeyini zino ze zivuddeko ekirwadde okweyongera era kwe kusalawo okuziwera.
Mu bitundu ebirala kuliko; Kazo, Kabarole, Mbarara, Luweero, Jinja, Kalungu, Kasese ne Tororo.
Ekiragiro ky’Omulamuzi Byabakama we kyajjidde nga Pulezidenti Museveni ewasinga yamazeeyo nga asigazza Wakiso, Kampala ne Mukono, amalirize kkampeyini ze.