Bya Musasi Waffe
Kampala
Munnakatemba Charles James Ssenkubuge Siasa yeewandiisizza okuvuganya ku bwaloodimmeeya bw’ekibuga Kampala, ekifo ekirimu Omuloodi Erias Lukwago, mu kalulu ka bonna aka 2021. Ono ajjidde ku kkaadi ya Democratic Party (DP).
Kino kiddiridde munnakibiina kya Democratic Party, Beatrice Kayanja okugaanibwa okwewandiisa Ssabbiiti ewedde olw’obutabeera mulonzi mu Kampala. Leero Ssenkubuge akedde ku kitebe kya DP ku Balintuma ng’awerekerwako Andrew Benon Kibuuka ne bannakibiina abalala, w’avudde okugenda okwendiisa.
Omwogezi w’ekibiina kino, Fred Mwesigwa, asinzidde wano n’ategeeza nga bw’ekyali entandikwa nga ku luno DP ezze na nkola mpya.
Mwesigwa agambye nti Ssenkubuge muntu wa linnya era ng’alina obuwagizi okuva mu bantu ab’enjawulo era nga balina essuubi nti ajja kubaleetera obuwanguzi.
Bannakatemba mu kalulu kati baweze basatu ng’abalala mulimu; muyimbi Joseph Mayanja (Jose Chameleone) atalina kibiina ne Daniel Kazibwe (Raggae Dee) owa NRM. Bano bagenda kuttunka ne Munna FDC, Erias Lukwago wamu ne Munna NUP, Nabilah Naggayi Ssempala.
Bannamateeka abalala bategeezezza nga Ssenkubuge bw’ali omuntu omutuufu okutwala obukulembeze bw’ekibuga era nga y’ajja okuweereza obulungi bannakampala.
Wadde okwewandiisa okusooka kwali kulina kukoma nga 1/10/2020 eri abaagala ebifo mu gavumenti ez’ebitundu, naye kwayongezebwayo okutuuka olwa leero nga 5/10/2020 olw’omujjuzo gw’abantu abaagala ebifo okubeera omungi.
Kinajjukirwa nti Ssenkubuge mu myaka egiyise, yali yeegwanyizaako okuvuganya ku bwapulezidenti wabula gye byaggweera ng’olwokaano aluvuddemu.