Bya Francis Ndugwa
Mmengo
Katikkiro wa Buganda, Charles Peter Mayiga, asabye abalonzi mu Buganda okulonda omuntu oyo gwe bakakasa nti ajja kulwanirira ensonga za Buganda Ssemasonga ettaano era awe Kabaka ekitiibwa.
![](https://gambuuze.ug/wp-content/uploads/2020/10/122400825_2699954783557876_4120781422945744182_o.jpg)
Bino Kamalabyonna abyogeredde mu bimuli bya Bulange olwaleero ku Lwokusatu bw’abadde asisinkanye bannakibiina kya National Unity Platform (NUP) abakulembeddwa Pulezidenti wakyo Robert Kyagulanyi Ssentamu, abadde azze okuloopera Katikkiro nga bw’agenze mu lutabaalo lw’okufuuka omukulembeze w’eggwanga.
Owek. Mayiga abadde awerekeddwako Minisita Kyewalabye Male, Minisita Noah Kiyimba awamu n’abakungu abalala, ategeezezza nti kizibu Buganda okulondawo omuntu omu n’emuwaddako eddusu wadde nga mu bantu abeesimbyewo abamu bayinza okuba nga basinga ku balala obusobozi.
“Abalonzi balonde abo abanaalwanirira ensonga za Buganda Ssemasonga ettaano. Twagala bannabyafuzi abalonzi bababuuze we bayimiridde ku Ssemasonga ettaano, twagala bannabyabufuzi boogere kaati we bayimiridde ku nsonga Ssemasonga ettaano. Kati awo abalonzi bajja kulondako omuntu awa Kabaka ekitiibwa, bajja kutegeera omuntu assa mu nnono n’Obuwangwa ekitiibwa,” Katikkiro Mayiga bw’annyonyodde.
Owek. Mayiga asabye bannabyabufuzi abakulu n’abato bagumiikirizigane era bawuliriziganye ku njuyi zombi era beewale okuyombagana, okuvumagana n’okutta abantu. Era baweebwe omukisa okwogerera ku mikutu gy’empuliziganya era bakomye embeera y’obunkenke.
Asanyukidde eky’abavubuka okwettanira obukulembeze n’okuzimba eggwanga kubanga kino kiyamba okutegeka n’okutereeza ebiseera eby’omu maaso naye n’abasaba okubeera n’enteekateeka eneeyanukula ebizibu ebyolekedde eggwanga.
“Abeeyagaliza ebifo ebyenjawulo, twagala okuwulira eddagala lye bajja nalyo. Bweziba nsonga za bukulembeze obutambulira mu mateeka n’ebiragiro, Kkooti ne poliisi zinaanogerwa ddagala ki? ” Owek. Mayiga bw’abuuzizza.
Kamalabyonna Mayiga asinzidde wano n’ategeeza nti mu Bulange baaniriza buli muntu kasita abeera nga assa ekitiibwa mu Ssaabasajja Kabaka n’Obwakabaka.
Mu kwogera kwe, Kyagulanyi ategeezezza nti y’ensonga lwaki ekitiibwa ky’Abataka wamu ne bannaddini kyatyoboddwa ku kiggwa ky’Abembogo e Mugulu ewa Jjajja Kayiira era n’asaba Kamalabyonna okwogera okukangula ku ddoboozi kubanga ye bw’ayogera awulirwa.
Ono ategeezezza Katikkiro Mayiga nti agenda kwesimbawo okukulembera Uganda nti bafunye obuwagizi okwetooloola eggwanga lyonna era ng’ebizibu by’ebitundu ebyenjawulo abitegedde neyeeyama okubikolako nga aweereddwa omukisa.
“Njagala okweyama mu maaso go ne mu maaso g’Obuganda nti n’ebizibu bya Buganda bwendi mwana wa wano, siyinza ate bibuusa maaso. Kale nno abaana ba Buganda bwe banneesiga nga abaana ba Uganda yonna bwe banneesize, bajja kuba tebatumye, bajja kuba beesitukidde,” Kyagulanyi bw’agambye.
Ono asinzidde wano n’asaba ababadde beemulugunya n’okukozesa ebigambo ebitasaanidde nti Buganda ne Katikkiro Mayiga si balabe baabwe, wabula ebitala byabwe babitunuulize obutali bwenkanya obuli mu ggwanga nababukola.
Mu nsisinkano eno Kyagulanyi awerekeddwako amyuka pulezidenti w’ekibiina mu Buganda, Owek. Mathias Mpuuga, Owek. Medard Sseggona, Omubaka Francis Zaake, Omubaka Nabilah Naggayi Ssempala, Shamim Malende, Fred Ssentamu, Kazibwe Bashir Mbaziira, Joel Ssenyonyi, Muhammad Ssegirinya n’ omuyimbi Mathias Walukagga awamu n’abantu abalala.