Bya Miiro Shafik
Lubaga Kyaddondo
Katikkiro Charles Peter Mayiga akulisizza abantu ba Buganda okutuuka ku Ssekukkulu, n’abasaba okwefumiitiriza ku bubaka bwa Kabaka obw’Amazaalibwa ga Yesu Kristo n’omwaka omuggya 2026.
Owek. Mayiga bw’abadde yetabye mu mmisa ya Ssekukkulu mu Lutikko e Lubaga, anokoddeyo ennyingo 6 mu bubaka bwa Nnyinimu n’asaba Obuganda okuzeefumiitirizaako wamu n’endala eziri mu bubaka buno. Zaanokoddeyo 6 ze zino;
1. Abakumaddembe obutatyoboola ddembe lya buntu.
2. Akakiiko k’ebyokulonda okukola omulimu gwako mu bwesimbu.
3. Okulonda n’obwegendereza olw’abo abayiwa ssente mu kalulu.
4. Tutereke emmere kubanga enkuba ntono mu mwaka guno.
5. Okufukirira ebirime.
6. Abakuumaddembe okukwata abo abasaddaaka abaana, n’ababazadde okukuuma obulungi abaana.
Kamalabyonna yebazizza Ssaabasumba Paul Ssemogerere akulembeddemu mmisa, era n’ayagaliza Obuganda okujaguza obulungi Ssekukkulu kyokka nga buli muntu ajjukire nti obulamu kikulu nnyo, era asabye buli omu okwekuuma okwewala obubenje.
Katikkiro ategeezeza nti 2025 gubadde mwaka gwa bibala ebiwerako kyokka ekisinze obukulu kwe kumaliriza Amasiro g’e Kasubi, bwatyo asabye Obuganda okwongera okunyweza obumu ne mu mwaka ogujja olwo kaweefube w’okuzza Buganda ku ntikko aggumire.
“Omwaka 2025 gubadde mulungi mu Bwakabaka, tusobodde okuggulawo amalwaliro, amasomero ga ‘Nusery’, abantu bajjumbidde okulima emmwanyi, kyokka kyenyiza okugamba ekisinze obukulu kwe kumaliriza Amasiro g’e Kasubi” Katikkiro Mayiga.
Ssaabasumba Paul Ssemogerere mu bubaka bwe asabye abazadde okufaayo ennyo ku baana baabwe naddala nga balondoola engeri gye bakozesaamu omutimbagano, gw’agambye nti engeri gye gutalina musunsuzi, abaana bamaliriza balabye ebyesittaza ne bayiga emize ate egisobola okwewalika.
Ye Minisita JC Muyingo ku lwa Gavumenti eya wakati yebazizza Ssaabasumba obubaka bw’awadde abazadde ku nsonga za baana era naye n’agattako eddoobozi ng’akubiriza abazadde okukuuma abaana obulungi mu kiseera kino eky’oluwummula.Minisita Muyingo asinzidde wano era n’akubirizza abantu okukozesa ekiseera kino eky’amazaalibwa ga Kristo buli omu yekube mu mutima okukola ebyo ebitatabangula ggwanga, ono agamba nti eddembe kikulu nnyo eri buli muntu era tewali asaana kukuma mu bantu muliro naddala mu kiseera kino eky’akalulu.Okusaba kwa Ssekukkulu mu Lutikko e Lubaga kwetabiddwamu Omulangira David Kintu Wasajja n’Omuzaana Marion Nankya, atikkiro
eyawummula Joseph Mulwanyamuli Ssemwogerere, avuganya ku bwa Pulezidenti Robert Kyagulanyi Ssentamu n’Omukyala Barbie Itungo Kyagulanyi, Abaami ba Kabaka ku mitendera egy’enjawulo, Robert Kasibante, n’Abakristo abalala bangi.