Musasi waffe
Minisita w’abavubuka, emizannyo n’okwewummuza Oweek. Henry Ssekabembe Kiberu olwaleero asisinkanyemu boodi ya Ssuubiryo Zambogo Sacco okutema empenda ku engeri Sacco eno gyerina okutambuzibwaamu emirimu gyayo.
Buli mwaka minisita asisinkana ebibiina eby’enjawulo ebiri mu minisitule eno okwogera ku ngeri gyebikolamu emirimu.
Bano bakulembeddwamu ssentebe waabwe Kaggwa Denis ng’ali wamu ne ssenkulu wa Sacco David Makumbi. Ssuubiryo Zambogo Sacco erina ekigendererwa ky’okukubiriza abavubuka okufissa ku ssente zebafuna oluvanyuma ne bazitereka saako okuzisiga nga ziweze. Ekibiina kino kikolera wansi w’omulamwa, Fissa, tereka, Siga.