Bya Ssemakula John
Busiro
Abavubuka ba Buganda bakubiriziddwa okukulembeze amagezi amazaale nga bateeka mu nkola obuvunaanyizibwa baabwe naddala nga bali mu bifo by’obukulembeze.
![](https://gambuuze.ug/wp-content/uploads/2020/10/2fa1aa85-08e2-452d-81a5-0f74f274b8ef.jpg)
Okusomesebwa kuno kukoleddwa Minisita w’Obwakabaka avunaanyizibwa ku bavubuka, eby’emizannyo n’okwewummuza, Owek. Henry Ssekabembe Kiberu bw’abadde abasisinkanye ku ssaza e Ssentema mu Busiro.
Minisita Ssekabembe abasabye okubeera abafumiitiriza era beekenneenye ensonga ezikwata ku ggwanga lyabwe baleme kwesuulirayo gwa Nnagamba.
Minisita Ssekabembe abalaze engeri gye basobola okusitulamu obukulembeze n’obuweereza bwabwe eri abantu ba Kabaka mu kitundu kino.
“Omutindo gw’obukulembeze bwo n’ebyosobola okukola ggwe nga omukulembeze ali wano, tebisobola kusukka busobozi bwo noolwekyo muve mu bukulembeze obwekibogwe,” Ssekabembe bw’abasabye.
Abakubirizza okwewala okubeera abakulembeze olw’ebifo naye bakole ebyo ebijja okubaleetera okukkirizibwamu era bannaabwe basobole okubeesiga basobole okubakulembera.
Owek. Ssekabembe abakubirizza okusitula omutindo gwabwe basobole okufuna okwolesebwa era babeeko ebintu ebikulu bye bakola biyambe obulamu bwabwe, Buganda esobole okudda ku ntikko.
“Kiki kyowulira bw’otunuulira omwana wo ali mu P.1, ali mu P.2 ng’ensi efafaagana okufaanagana bweti ng’eggwaamu ekitiibwa,” Owek. Ssekabembe bw’abuuzizza.
Mu kwogerakwe asabye abavubuka okubeera ekyokulabilako eri be bakulembera era n’avumirira ekikolwa kya poliisi ekyokulumba abataka ku kiggwa ky’ ab’Embogo e Mugulu mu Mityana.
Bwe yabadde asomesa Ssenkusu Balikuddembe ategeezezza abakulembeze okukimanya nti eggwanga lino lyabwe kuba be basinga obungi mu Uganda ne Buganda.
Ono asabye abavubuka obutabeera bakireereese wabula bafuuke ab’obuvunaanyizibwa nga bakola buli ekisoboka basobole okwesitula n’okukyusa embeera zaabwe.
Ate ye, Omwami wa Kabaka atwala essaza Busiro, Ssebwaana Charles Kiberu Kisirinza asiimye Nnyinimu Ssaabasajja Kabaka olw’enteekateeka eno kuba egenda kugasa nnyo abavubuka.