Bya Francis Ndugwa
Busimbi – Ssingo
Minisita avunaanyizibwa ku by’obulamu, ebyenjigiriza ne woofiisi ya Nnaabagereka, Dr. Prosperous Nankindu Kavuma alabudde abeesenza ku ttaka lya Buganda n’okwewang’amya mu bizimbe byabwo mu bukyamu okukikomya.
Okulabula kuno Owek. Nankindu akukoledde ku Busimbi mu Ssingo bw’abadde alambula ettaka lya Buganda erisangibwa mu kitundu kino n’okulaba enteekateeka y’okutumbula eby’obulamu mu bantu ba Kabaka bwenatambula.
“Kikulu nnyo abantu obuteegwanyiza ttaka na byabugagga bya Bwakabaka kubanga Buganda tegenda kuggwaawo leero, abantu bakyajja, abaana bakyazaalibwa era n’emirimu mingi egirina okukolebwa,” Owek. Nankindu bw’ategeezezza.
Owek. Nankindu agamba nti olukusa olukkiriza omuntu okukolera ku ttaka oba ebizimbe bya Buganda bulina kuva mu kitongole kya Buganda Land Board (BLB) oba Nnamulondo Investments ekola ku bizimbe bya Buganda nga tewali muntu mulala yenna ayinza kugaba lukusa luno.
Okusinziira ku Minisita Nankindu, Buganda egenda kuzimba ku ttaka lino eddwaliro awamu n’amasomero okusobola okulaakulanya abantu baayo.
Omwami wa Kabaka atwala Ssingo, Mukwenda David Nantagya ategezezza nti ettaka eliri mu gombolola ye Busimbi litudde ku yiika 107 nga lyali lyesenzebwako ebitongelo okuva mu gavumenti eyawkati kyokka ebisinga byamala dda okuzibwayo embuga.
Ono yeekokkode abantu abakyalemedde ku ttaka lino kyokka nabasaba okuyita mu makubo amatuufu olwo balibeereko nga bamanyiddwa mu mateeka era beewale okutaataaganyizibwa.