Bya Ronald Mukasa
Kampala – Kyaddondo
Minisita wa Bulungibwansi, Obutonde, Amazzi n’Ekikula ky’Abantu, Owek. Mariam Mayanja Nkalubo asabye abantu okukuuma obuyonjo bwebaba baagala okugoba obwavu bakulaakulane.
Obubaka buno, Minisita Nkalubo abuweeredde mu Kampala bw’abadde yeetabye ku mukolo gw’okwetegekera Ssaabiiti y’Obutondebwensi etegekebwa Gavumenti Eyawakati ng’eno etandika 18 okutuka nga 22 omwezi guno.
Era yakuyindira wansi w’omulamwa ogugamba nti, “Okulowooza okwawamu nokuvaayo n’ensonga ezigonjoola ebbula ly’amazzi n’okutyoboola obutondebwensi mu Uganda.”
Minisita Nkalubo nga yabadde omulongoosi omukulu ow’olunaku asabye bannayuganda okufaayo okukuuma obutondebwensi kiyambe eggwanga obutalumbibwa ddungu.
Ye Omuteesiteesi Omukulu owa Minisitule y’Amazzi n’Obutondebwensi, Alfred Okidi, asabye bannayuganda bakomye okusanyaawo entobazi n’ebibira era basimbe emiti kulw’ ebiseera by’omu maaso ebitangaavu.
Enteekateeka eno etandikidde Luzira, Kitintale ne Lugogo nga yeetabiddwamu abakungu okuva mu KCCA, bannaddiini, abakulembeze ab’enjawulo, amasomero, amalwaliro, Rotary Club, Uganda Prisons, Nile Breweries, Uganda Breweries, UMA, USSIA n’ ebitongole ebirala.