Bya Ssemakula John
Kasubi – Busiro
Minisita w’Olukiiko, Amawulire, Kkabineeti era Omwogezi w’Obwakabaka bwa Buganda, Oweek. Noah Kiyimba asabye abayizi bulijjo okwettanira amasomo g’ebyemikono kuba gano gegasobola okubayamba ku bbula ly’ emirimu nga gibasobozesa okwetandikirawo emirimu.
Okusaba kuno Owek. Kiyimba yabyogeredde Kisubi bwe yabadde atikkira abayizi abaamaliriza emisomo ku Michelangelo College of Creative Arts Kisubi, ku Lwokutaano lwa wiiki ewedde nga 8 Kasambula, 2022.
Owek. Kiyimba yagambye nti amasomo agasomesebwa mu matendekero ag’ebyemikono gayamba nnyo omuntu wabulijjo okwekulaakulanya mu by’enfuna ne mu mbeera ezby’obulamu.
Yayongeddeko nti Uganda erina eby’obugagga bingi ebyetaaga okusimwa biyambe okutumbula embeera z’abantu, bw’atyo neyeebaza amatendekero agafubye okutendeka abayizi mu bukugu obwetaagisa okukola emirimu egyo.
Owek. Kiyimba yakuutidde abaatikkiddwa okukola n’amaanyi gaabwe okutuuka ku kisinga obulungi era nabagumya obutatya kusomoozebwa kwebagenda kusanga naye banyweze obuyiiya, obwesimbu wamu n’obugumiikiriza okusobola okuwangula.
Ye Bro. Frederick Musaazi asiimye nnyo omutindo ogwolesebbwa abayizi abayise mu ttendekero lino era n’asuubiza okulinnyisa eddaala okuva ku ssatifikeeti ne dipulooma, batuuke ku mutendera ogwa ddiguli.
Omukolo guno gwe gw’ Amatikkira ag’omulundi ogwe 10 era nga abayizi abasobye mu 100 bebatikiddwa era gwatandise n’ekitambiro ky’ emmisa ekyayimbiddwa Rev. Fr. Richard Nnyombi.