Bya Betty Namawanda
Masaka – Buddu
Minisita omubeezi avunaanyizibwa ku by’obulimi, obulunzi, obusuubuzi n’obwgassi mu Buganda, Owek. Hajji Amis Mukasa Kakomo akunze bannabuddu okuddamu balime emmwanyi nga bwe gwali emabegako, kibayambe okuva mu bwavu wamu n’okukulaakulanya Buganda.
Okusaba kuno Owek. Kakomo akukoledde Masaka mu Buddu bw’abadde atongoza emmerezo y’emmwanyi eteereddwa ku mbuga y’essaza okusobola okutumbula ekirime kino mu Buddu ne Buganda.
Owek. Kakomo era aliko ebintu ebyeyambisibwa mu kulima by’awaddeyo eri Buddu ne Mawogola nga bino abikwasizza Ppookino Jude Muleke nga bino byatoneddwa bannamukago gwa Private Sector Foundation.
Ono awabudde abantu okwettanira okunywa kkaawa basobole okutondawo akatale k’ekirime ky’emmwanyi akasookerwako era balowooze nnyo ne ku ngeri gye basobola okuzigattako omutindo baleme kitundirawo kuba bafiirwa.
Minisita Kakomo era aliko abalimisa b’awadde Satifikeeti oluvannyuma lw’okutendekebwa Obwakabaka n’ekitongole kya Directorate of Industrial Training (DTI), okunnyikiza ennima y’emmwanyi n’emmere ey’omulembe mu bitundu by’e Mawogola ne Buddu.
Ono yeebazizza nnyo ebitongole ebizze bikola emikago ne Buganda nga bigiyambako mu lugendo luno wamu n’okwebaza abalimisa abeewaddeyo ne babangulwa wakati mu kubakubiriza okukola obulungi omulimu guno.
Ate ye omwami wa Kabaka akulembera Buddu, Ppookino Jude Muleke yeebazizza abantu ba Kabaka olw’okujjumbira enteekateeka eno ey’Emmwanyi Terimba basobole okuzza Buganda ku ntikko.
Ye omukungu w’ekitongole ekirung’amya okulima emmwanyi mu ggwanga ekya ‘Uganda Coffee Development Authority ( UCDA),’ Robert Ssentamu yeenyumirizza mu nkolagana ekitongole kino gye kirina n’Obwakabaka era n’alaga nti emmerezo eno egenda kuwonya abalimi emmwanyi ezitali za mutindo.
Omu ku balimisa abafunye amabaluwa, Disan Muwanga Matovu ategeezezza nti beetefuteefu okuyigiriza abantu ennima ey’omulembe wakati mu kusaba ekitongole kya UCDA okwongera ku bungi bw’emmwanyi bwekiwa abalimi kubanga tebasobola kuzeetuusaako mu kiseera kino.
Kinajjukirwa nti Obwakabaka bwatongoza enteekateeka y’okusimba emmerezo ku buli mbuga ya ssaza my Buganda wadde nga egenda kutandikira mu masaza 7 okuli; Buddu, Mawokota, Ssingo, Kyaggwe n’amalala.