![](https://gambuuze.ug/wp-content/uploads/2020/06/Mao.png)
Omukulembeze w’ekibiina ky’ebyobufuzi ekya Democratic Party, Norbert Mao agambye nti Olukiiko lw’eggwanga olukulu lulina okuteesa ku kwongerayo akalulu ka 2021.
Bwabadde ayogerako ne Bannamawulire Mao ategeezezza nti tebayinza kukkiriza Kakiiko kabyakulonda kutegeka kalulu kataliimu kampeyini ng’ate tebeebuuzizza ku bantu bekikwatako.
“Bwabanga coronavirus waabulabe nnyo lwaki tebongezaayo kalulu kano. Ono ssemateeka ffe twamukola era tusobola okumukyusa nga bwetwagala,” Mao bweyagambye.
Ssabbiiti eno omukubiriza w’olukiiko lw’eggwanga olukulu, Rebecca Kadaga yalagira akakiiko akakola ku nsonga z’amateeka okusisinkana akakiiko k’ebyokulonda bateese ku nteekateeka yaabwe ey’okutegeka akalulu ka 2021.
Mao agamba nti NRM etegese akalulu ka sayansi kubanga bebalina bokka obusobozi obukeesimbamu nebawangula.
“Ogamba otya nti omuntu ajja kukuba kampeyini nga ayitira mu mawulire ng’ebitundu ebimu tebirina n’amawulire gano? Mao bweyeebuuzizza.
Okusika omuguwa okwamaanyi kukyagenda mu maaso muggwanga nga bannabyabufuzi abali ku ludda oluvuganya gavumenti bagamba nti kikafuuwe okukkiriza akalulu ka sayansi.
URN