Bya Betty Namawanda
Kyotera – Buddu
Ssenkaggale w’ekibiina kya Democratic Party, Nobert Mao, akalaatidde ababaka ba palamenti abava mu Buganda okufungiza okulaba nga gavumenti eddiza Buganda ebintu byayo by’ebanjirizza ebbanga eddene ng’agamba nti bwe buvunaanyizibwa bwabwe obusookera ddala mu palamenti y’omulundi guno.
Mao agamba nti ekiseera kituuse gavumenti esse ekitiibwa mu ndagaano gye yakola n’Obwakabaka bwa Buganda ne yeeyama okuzza ebintu byayo byonna.
Ono bino yabyogeredde ku kyalo Jongoza mu ggombolola ya Kaliisizo Rural mu disitulikiti y’e Kyotera ku mukolo omubaka omulonde John paul Lukwago Mpalanyi kwe yasiimidde abalonzi wamu n’okwebaza Katonda olw’ekkula lino.
Mao yategeezezza nti abakulembeze ab’ensikirano bonna bakimanyi bulungi nti Buganda yamaanyi era bakkiriza nti ekintu ekikosa Buganda kikosa obukulembeze bwonna obw’ensikirano n’asaba ababaka abava mu Buganda okufaayo ku nsonga z’Obwakabaka omulundi guno.
Ono yasiimye bannakyotera okwesiga DP wakati mu muyaga gw’ebyofuzi ogwali omunene era ne yeeyama okuzimba ebbanguliro ly’obukulembeze mu kitundu kino okwongera okutendeka abakulembeze baayo. Omumyuka asooka owa Ppookino, owek. Rose Nalubowa, yasinzidde wano naye n’akuutira ababaka okulwanirira ensonga Ssemasonga etaano eza Buganda naddala nga balwanirira okukuuma n’okutaasa Nnamulondo.
Emikolo gino gyatandise na kitambiro kya mmisa ekyakulembeddwamu Rev. Fr. Cosmas Kaboggoza nga ye Bwannamukulu w’ekigo ky’e Bateremu era mu kuyigiriza kwe yasabye ababaka okulwana ssaako n’okufuba okulaba nga bakola ku nsonga eziruma abantu naddala nga bassa essira mu by’obulamu n’ebyenjigiriza ebikwata ku muntu asembayo.
Rev. Fr. Kaboggoza era yeekokkodde abantu abaasibwa mu makomera awatali musango n’asaba Gavumenti okubayimbula kizze emirembe.
Mu kwogera kwe, John Paul Lukwago Mpalanyi, yasabye babaka banne okwewala entalo kubanga eby’obufuzi byaggwa nga kino ky’ekiseera okukolera abantu awatali njawukana z’abyabufuzi, ssaako eddiini n’ebirala okusobola okukulaakulanya ekitundu kyabwe.
Ye omubaka omukyala owa Kyotera, Fortunate Rose Nantongo, yagumizza Bannakyotera nti beetegefu okubaweereza nga tewali muntu yenna agenda kubagulirira oba okubabuzaabuza okusobola okubaggya ku mulamwa. Ssentebe wa disitulikiti y’e Kyotera, Patrick Kintu Kisekulo, yasabye abakulembezze mu Disitulikiti eno okusaka ssaako n’okukolera awamu batumbule embeera z’abantu .
Omukolo guno gwetabiddwako ababaka abalala okuli; Geoffrey Lutaaya , Joanita Namutawe ne Ronald Evans Kanyike, nabo abaasabye bannaabwe okukola ennyo baleme kuswaza balonzi.