Bya Ssemakula John
Kampala
Ssenkaggale w’ekibiina kya Democratic Party (DP), Norbert Mao atabukidde ekibiina kya National Unity Platform (NUP) ekiri ku ludda oluvuganya gavumenti olwa ssente ezisoba mu buwumbi 3 ze bafuna okuva mu mukago gwa Inter-party Organisation for Dialogue (IPOD) ze batayagala kwogerako.
Mao agamba nti ensimbi zino zaweebwa aba NUP okusobola okubayambako okutambuza emirimu gyabwe obulungi.
Bino we bijjidde nga NUP yaakamala okutegeeza nga bwetajja kutwala ssente okuva mu mukago guno ekiseera gye kinaakoma nga Pulezidenti Museveni agukozesa okunyweza obukulembeze bwe obutaliimu bwenkanya.
“Kimanyiddwa nti NUP yagaana okwegatta ku IPOD olw’ensonga ze twawa era tennafuna ku ssente yonna okuva mu IPOD eziweebwa ebibiina ebiri mu mukago guno. Byonna twabirina kuba Museveni byakozesa okwenyereza mu buyinza.” NUP bw’eyalaga mu Desemba wa 2021 ng’akalulu kaakagwa.
NUP ezze erumiriza ekibiina kya NRM okufuula omukago gwa IPOD ensisinkano y’okunywamu kaccaayi naye talina bigendererwa kunyweza demokulaasiya.
Okusinziira ku Mao omukago guno wadde abamu ku ludda oluvuganya baguwakanya naye ate gulina ebikulu abawakanya omukago guno bye batayogerako.
“Mutwebaze ffe abeekubya ebifaananyi n’okunywamu kacaayi, abamu ku baali bawambibwa ne basibwa bayimbulwa. N’ekirala ssente eziweebwa ebibiina ebyenjawulo ebirina ababaka z’ayongerwako. Era kati abamu balya nnyama ate abalala balyamu ssupu.” Mao bw’annyonnyodde.
Ono asabye ab’oludda oluvuganya okulabira ku nsi nga Tanzania abavuganya gye basisinkanira ne gavumenti eri mu buyinza ne babaako bye bakkaanya kuba enkola eno ejja kusobola okutwala eggwanga mu maaso.
Ku nsonga eno, Ssaabawandiisi wa David Lewis Rubogonya agamba nti ng’ekibiina bagenda kufulumyawo ekiwandiiko ekitangaaza ku nsonga zonna ezoogeddwa abanene ab’enjawulo.