Bya Ssemakula John
Kampala
Ekibiina ki NUP kiwangude ekifo kya Sipiika wa Kampala Capital City Authority ne kimegga NRM ebadde esimbyewo kkansala w’abavubuka ku kifo kino. Olukiiko lwa KCCA olukulu olwaleero lulonze sipiika agenda okuddukanya emirimu mu kisanja kino ng’embiranyi ey’amaanyi ebadde wakati w’ekibiina kya NUP ne NRM era gye biggweeredde nga KCCA ekyetisse era n’ewangula eggombolola 3 ku ggombolola 5 ezikola ekibuga Kampala.
Ku ssaawa 5 ezenkya ssenkulu wa KCCA, Dorothy Kisaka n’omulamuzi Ayo Mirriam Okello, batuuzizza olukiiko olusoose era okulonda ne kutandika.
Akalulu kano akabadde akeekyama kabadde wakati wa munnakibiina kya NUP, Zahara Luyirika nga ye kkansala wa Makindye ng’attunse ne munnakibiina kya NRM, Shamim Namukasa.
Gye biggweeredde nga Luyirika awangudde n’obululu 43 ate NRM n’efuna obululu 8.
Oluvannyuma omumyuka wa Sipiika wa KCCA alondeddwa era okukkakkana nga Nasur Masaaba owa National Unity Platform (NUP) akalulu akawangudde bw’afunye obululu 12 ate Allan Mwesige owa NRM n’afuna obululu 9 bwokka.
Omuloodi Lukwago oluvannyuma lw’okufuna amawulire ku Sipiika alondeddwa, amuyozaayozezza era n’asuubiza okukolagana n’abakulembeze abaggya era ng’abasabye buli ludda luwe lunnaalwo ekitiibwa.
Ono agamba nti Kampala alina okusoomoozebwa okw’amaanyi nga kye kiseera bagatte amaanyi okuweereza abantu.
Ate okulonda basipiika b’eggombolola 5 ezikola ekibuga Kampala kwetobeseemu emivuyo egy’amaanyi era mu ggombolola ezimu okulonda kuggweeredde mu kusika muguwa era awamu eng’uumi zinyoose.
E Makindye n’e Lubaga, okulonda sipiika kuzzeemu omukoosi; bakkansala bwe batandise okulwana era bangi bavuddeyo n’ebisago abalala bakaabye ate abamu ne bazirika.
Kabadde kaseera ka kusoomoozebwa nga munna NRM , Musa Mbaziira awangula munna NUP, Rehema Ffuge, ekitabudde bakkansala ba NUP kubanga be basinga obungi ku lukiiko luno.
Bano batandise okwerangira okulya enguzi ne batunda ekibiina era ekiddiridde kwe kukubagana ebikonde, embeera eyongedde okutabuka okutuusa poliisi bw’etuuse era embeera n’edda mu nteeko.