Bya Ssemakula John
Kampala
Eyaliko Minisita w’ebyokwerinda, Gen Henry Tumukunde, asabye bannayuganda okuvaayo mu bungi beetabe mu kalulu ka bonna aka 2021.
![](https://gambuuze.ug/wp-content/uploads/2020/11/Tumukunde-1024x591.jpg)
Okusaba kuno Tumukunde akukoze yaakamala okukakasibwa ng’omu ku bagenda okwesimbawo ku bwapulezidenti, bw’abadde ayogerako eri bannamawulire, Tumukunde agambye nti akalulu kano kakulu nnyo mu byafaayo bya Uganda.
“Kano ke kalulu akasinga ok’omugaso mu bulamu bwange okuva mu 1980,” Tumukunde bw’agambye.
Tumukunde annyonnyodde nti ayagala bannayuganda abawera obukadde 17.9 bakole ng’Abamerika bajjumbire akalulu kano ng’Abangereza bwe baakola mu ‘Brexit’ nabo balonde mu bungi.
Ono asabye banne abali ku ludda oluvuganya baveeyo bakunge abantu okwetaba mu kulonda kuno.
Okusooka okukakasibwa kwa Tumukunde, kwasoose kujjamu mukoosi oluvannyuma lwa ssentebe w’akakiiko k’ebyokulonda okumulagira asooke atereeze ebibadde bitakwatagana mu biwandiiko bye.
Kino kyazzeewo olw’obutaba na mukono gwa Kamisona akubisa ebirayiro era bw’atyo n’asabibwa okugenda agufune n’oluvannyuma akomewo akakasibwe.
Oluvannyuma Ssentebe w’akakiiko k’ebyokulonda, Simon Byabakama, amukakasizza ng’omu ku beesimbyewo era n’amusaba alonde akabonero k’agenda okukozesa mu kalulu kano. Tumukunde alonzeewo essaawa nga gy’agenda okukozesa mu kalulu kano.
“Twekenneenyezza empapula za Tumukunde Henry Kakulugu. Era Nze Omulamuzi Byabakama Mugenyi Simon nga nze nkuliddemu okuwandiisa abeesimbyewo, nangirira Henry Tumukunde Karuguru ng’omu ku bantu abeesimbyewo nga atuukirizza obukwakkulizo bwonna obwa ‘Presidential Elections Act,” Byabakama bw‘annyonnyodde.
Byabakama amusabye okubawa enteekateeka ye gy’agenda okunoonyezaako akalulu, kibayambe okumulambika obulungi.