Kkooti ejulirwamu eyimirizza olukungaana ttabamiruka olw’ekibiina ky’ebyobufuzi ekya Uganda people’s Congress [UPC] okutuuka ng’emaze okuwulira okujulirwa okuwaakanya okulondebwa kwa Jimmy Akena ng’omukulembeze waakyo.
Olukungaana luno lubadde lusuubirwa okubeerawo nga August 1 ku lwomukaaga ssabbiiti eno.
Abalamuzi abasatu abatuula mu kkooti eno bayimirizza olukiiko luno oluvanyuma lwa bannamateeka b’omuwaaabi Peter Walubiri okutegeeza nti singa olukiiko luno lugenda mu maaso bagenda kufiirwa ebitenkanika singa omusango gusinga abawawaabirwa.
Walubiri akiikirirwa munnamateeka Julius Galisonga.
Ono yategeezezza nti olukiiko olugenda okutuula lugenda kulonda abakulembeze b’ekibiina abanaakulembera emyaka etaano egyijja.
Munamateeka wa Akena tayawakanyizza nsalawo eno.
Abalamuzi kubaddeko, Elizabeth Musoke, Christopher Izama Madrama ne Irene Mulyagonja.
Bano era bayimirizza Akena okuggyayo ssente z’ekibiina okuva mu bbanka ya Orient ne Housing Finance okutuusa ng’omusango gusaliddwa.
Kyokka Kyazze kino yakiwakanyizza ng’agamba nti abakozi b’ekibiina bebagenda okubonaabona kubanga bagenda kuba tebafuna musaala.
Abalamuzi batadde ebigere wansi ne bagamba nti bano babadde baweereddwa akaseera akamala kyokka nebagaana okukkiriziganya.
Abalamuzi basabaye enjuyi z’ombi ziwandiike empoza yaazo bagiweeyo ng’omwezi gwa Agusito tegunnagwako era nebasuubiza okuwa ensalawo yaabwe ebbanga lyonna.
URN