Bya Ssemakula John
Kampala
Kkooti etaputa Ssemateeka ekkirizza Pulezidenti okulonda ababaka ba Palamenti ku bwaminisita kuba tekikontana na Ssemateeka.
Kino kiddiridde bannayuganda babiri okuli; Isaac Wadada ne Hakim Nsimbe, okuddukira mu kkooti eno nga basaba esazeemu ekya Pulezidenti okulonda ababaka ba Palamenti ku bwaminisita era esattulule n’akakiiko k’ebyokulonda kuba kalemeddwa okukola emirimu nga basinziira ku musango ogwakawaabirwa mu 2016 awamu n’okutondawo disitulikiti oluvannyuma lw’akalulu kano.
Abalamuzi ba kkooti eno bonna bataano nga bakulembeddwa Omulamuzi Richard Buteera, bagamba nti Ssemateeka awa pulezidenti obuyinza okulonda ababaka ku bwaminisita awamu n’abantu abalala abalina ebisaanyizo okufuuka ababaka.
Abalamuzi era bakinogaanyizza nti ababaka ababeera balondeddwa ku bwaminisita baddembe okusigaza ebifo byabwe mu Palamenti kuba tekirina we kikontanira na Ssemateeka.
Mu nsala yaabwe, abalamuzi bategeezezza nti abawaabi balemereddwa okuleeta obujulizi obumala okulaga ng’akakiiko k’ebyokulonda bwe kaalemwa okukola emirimu gyako obulungi.
Wabula abalamuzi bakkaanyizza n’abawaabi nti akakiiko k’ebyokulonda okutondawo disitulikiti okuli Kagadi, Kakumiro, Omoro, Rubanda ne Kibaale oluvannyuma lw’akalulu ka 2016, kyali kimenya Ssemateeeka.