Bya Ssemakula John
Mubende
Kkooti enkulu e Mubende esazizzaamu okulondebwa kwa munnakibiina kya National Unity Platform (NUP), Joyce Bagala Ntwatwa ng’omubaka omukyala owa disitulikiti ye Mityana nga egamba nti akalulu kano kaalimu ebirumira.
Mu kalulu ka bonna akaakubwa nga January 14 2021, Bagala yafuna obululu 64633 nawangula Minisita w’ebyettaka Judith Nabakooba eyafuna obululu 48322 era nga yeyali mu kifo kino.
Wabula Nabakooba yaddukira mu kkooti nga alumirizza Bagala okwekobaana n’akakiiko k’ebyokulonda nebabba obululu nga balondesa abantu abakyamu, okulondera mu mannya g’abalala awamu n’okulonda emirundi egisukka mu gumu.
Okusinziira ku Nabakooba aba Bagala batiisatiisa ba Agenti be nebalemesa abalonzi be okumuwa akalulu.
Enkya ya leero, Omulamuzi Emmanuel Baguma ategeezezza nti waliwo obujulizi obumala okukakasa nti Bagala nga ayita mu ba Agenti be era nga akimanyiko bamenya amateeka g’ebyokulonda n’okugulirira abalonzi.
“ Kkooti esazeewo nti omuwawabirwa ow’okubiri era omubaka omukyala owa Mityana, Joyce Bagala addeko ebbali,” Omulamuzi bw’ategeezezza.
Omulamuzi alagidde akakiiko k’ebyokulonda okuddamu okutegeka akalulu okujjuza ekifo kino era nalagira Bagala okuliyirira Nabakooba ssente zasasaanyizza mu musango guno.
Ye Joyce Bagala ategeezezza nti agenda kujjulira kuba omulamuzi alemeddwa okuwa ensonga ez’essimba zasinziddeko okusazaamu okulondebwa kwe.
Ate ye Nabakooba asanyukidde ensala eno nagamba nti kyaddaaki eddoboozi lya bannamityana liwuliddwa kuba obuwanguzi bwe bwali bumutwaliddwako.