Bya Musasi Waffe
Iganga
Ekitalo kigudde mu disitulikiti y’e Iganga ne Bugweri, Ssentebe w’abalema mu kitundu kino, Christine Kisubi, enjuyi bwe zimuzinze ne zimuluma n’afa ku Ssande ekiro.
![](https://gambuuze.ug/wp-content/uploads/2020/12/Kisubi.png)
Kisubi ow’emyaka 44 abadde musomesa ku ssomero lya Namalemba Day and Boarding era ng’enjuki zaamusanze mu maka ge e Buseesa mu ggombolola y’e Ibulanku mu disitulikiti y’e Bugweri.
Ono yaddusiddwa mu ddwaliro lya Busesa Health Centre IV era gye yafiiridde ku lunaku lwa Ssande.
Mwannyina w’omugenzi, Samuel Kisubi, yategeezezza nti mwannyina abadde atambulira mu kagaali ng’enjuki bwe zaamulumbye okumala essaawa 2, wabula n’alemererwa okwerwanako.
Akulira okulambula amasomero mu Bugweri, Swaibu Ssekimuli, yagambye nti bafiiriddwa nnyo kubanga Kisubi abadde yeewaayo okukubiriza abazadde okukuumira abaana baabwe mu masomero naddala abo abaliko obulemu basobole okuba ab’omugaso.
“Kibi nnyo olw’okufiirwa omusomesa waffe eyalumiddwa enjuki naye wadde afudde ettofaali lyatadde ku byenjigiriza lirabibwa buli omu.” Ssekimuli bwe yagambye.
Ssekimuli yannyonnyodde nti, wadde Kisubi abadde aliko obulemu naye abadde akolagana n’abantu ab’enjawulo okulaba ng’ebyenjigiriza mu kitundu kino bitumbuka era nga yenyingiramu okulaba ng’omwana omuwala tava mu ssomero.