Kamwokya
Entiisa ebuutikidde abatuuze b’e Kamwokya ababadde mu lumbe lwa mutuuze munnaabwe, aba LDU ne poliisi bwe babakubyemu amasasi nga bakwasisa kafyu, okukkakana nga omu ku bannaabwe afudde.
Eyattiddwa ye Mark Lubowa ow’emyaka 22 ng’ono yakubiddwa essasi mu mutwe n’addusibwa mu ddwaliro e Mulago, wabula n’afa ku Lwokusatu akawungeezi.
Ebizuuliddwawo biraga nti essasi Lubowa lyamukubiddwa ku ssaawa ttaano, mu kiro ky’Olwokubiri bwe baabadde ku kyoto mu lumbe lwa Emma Ssemanda e Kamwokya ku kyalo kya Kisenyi II.
Abatuuze bategeezezza nti, mu kiro nga bali ku lumbe lwa Ssemanda eyakooneddwa emmotoka ku luguudo lwa Northern Bypass, baalabye aba LDU ne Poliisi abaabadde n’embwa za poliisi okuva ku poliisi y’e Kyebando nga bakulembeddwa akulira eby’okwerinda ku kyalo ekibalirilaanye ayitibwa Hajji Busaale, nga batambula bajja gye bali.
Wano abamu ku bakungubazi baatidde nebatandika okudduka era wano omu ku ba LDU we yakubidde essasi eryakutte Lubowa ku mutwe.
Mwannyina w’omugenzi Lubowa, Winnie Luyiga, annyonnyodde nti abakungubazi tebaabadde bangi naye bwe baalabye abapoliisi ne batuuni awamu n’embwa, baatidde nebatandika okudduka era ekyazeeko gaabadde masasi.
“Abantu tebaabadde bangi naye ate tosobola kuleka lumbe, mwenna mwenna muyingire mu nnyumba mwebake n’omulambo nga musibyewo, naye era musobola okuleka oluggi nga luggule era abamu nemubeera wabweru,” Luyiga bw’ategeezezza.
Akulira abavubuka mu Kisenyi II, Mwanje Stuart avumiridde ekikolwa kino n’ategeeza nti tewaabadde nsonga ekubisa ba LDU masasi mu bakungubazi kubanga baabadde mu nnaku yaabwe.
Omwogezi w’ekibinja kya wansi, Maj. Bilal Katamba bw’atuukiriddwa ku nsonga eno atusindise wa mwogezi wa Kampala n’emiriraano Afande Patrick Onyango.
Katamba agambye nti yasembye okumanya nga aba LDU ne poliisi balina ekikwekweto kyabakola ku luguudo lwa Northern Bypass mu kiro ekyo kyennyini naye ng’abadde tannafuna ku ggulire lya muntu yenna kukuddwa ssasi.
Kaweefube waffe okwogerako n’Omwogezi wa poliisi mu Kampala n’emirilaano, Patrick Onyango n’omumyuka we, yagudde butaka olw’obutakwata ssimu zaabwe.
Abantu abasoba mu 10 be bafiiriddwa obulamu wakati ng’abeebyokwerinda bakwasisa ebiragiro bya COVID-19 mu bitundu by’eggwanga ebyenjawulo.
Bya URN