Bya Ssemakula John
Kampala
Minisitule y’ebyobulamu mu ggwanga ekakasizza nga bwewaliwo omusawo omulala afudde ekirwadde kya Ebola.
Omusawo ono ye Margret Nabisubi ow’emyaka 58 ng’ abadde omu kwabo abayamba okusirisa abalwadde abagenda okulongoosebwa mu ddwaliro ekkulu e Mubende.
Nabisubi yafiiridde mu ddwaliro lye Fort Portal gyabadde yatwalibwa okufuna obujjanjabi obusingawo.
Okusinziira ku Minisita w’ebyobulamu Jane Ruth Aceng, omusawo ono yagenda okuzuulwa nti alina ebola nga bwakamulumira ennaku 7, n’assibwa ku byuma amazeeko ennaku 10 naafa.
Ono kati ye musawo ow’okubiri okufa ebola mu bbanga lya wiiki emu, nga eyasooka ye Dr. Muhammad Ali eyali omuyizi ku KIU University, wabula nga yali yasindikibwa mu ddwaliro ly’e Mubende okugezesebwa.
Kinajjukirwa nti abasawo 6 bebaazuulwamu ebola mu ddwaliro e Mubende, gyebagyibwa nebatwalibwa e Fortportal okwongera okufuna obujanjabi.
Akulira eby’okusomesa abantu ku ndwadde n’ebyokugema mu Minisitule y’ebyobulamu Dr Daniel Kyabayinze annyonnyodde nti waliwo abantu abalemedde mukuwa amawulire ag’obulimba ku kirwadde kya Ebola, nga mwemuli n’abasawo abegattira mu kibiina kya UMA, eky’obulabe eri olutalo lwokulwanyisa Ebola.
Ate kyo ekitongole ki USAID nga kikolagana wamu naba World Health Organization kiwaddeyo ebimu ku bintu ebikozesebwa okulwanyisa ekirwadde kino okuyambako ku lutalo luno
Ebintu ebiweereddwawo byakutwalibwa mu ddwaliro e Mubende.
Abantu 43 bebakakasibwa okuba nga bebaakazulwamu ebola, 10 bebaakafa.