Bya Musasi Waffe
Munnayuganda omuddusi w’emisinde, Jacob Kiplimo ow’emyaka 19, awangudde emisinde gy’okwetooloola ebyalo egya World Half Marathon Championship ng’agiddukidde eddakika 58:49 n’asitukira mu mudaali gwa Zzaabu nga gibadde mu ggwanga lya Poland.
![](https://gambuuze.ug/wp-content/uploads/2020/10/IAAF-kip.jpg)
Ate ye Munnayuganda omulala, Joshua Cheptegei amalidde mu kifo kyakuna mu misinde gino era ng’agiddukidde eddakika 59:21 era nga guno gwe mulundi gwe ogusoose okudduka emisinde gino.
Abantu ab’enjawulo bavuddeyo okuyozaayoza Kiplimo ne Cheptegei ku buwanguzi buno era nga Minisita w’eby’enjigiriza n’ebyemizannyo era mukyala wa Pulezidenti Museveni, Janet Kataaha Museveni, ayitidde ku kibanja kye ekya Twitter n’abasiima olw’okuwanika bbendera ya Uganda.
“Yogaayoga Jacob Kiplimo olw’okuwangula #WorldHalfMarathon mu ddakika 58:49. Naawe Joshua Cheptegei yogaayoga olw’okumalira mu kifo ekyokuna. Tubeenyumirizaamu, mugende mu maaso era Katonda abawe omukisa,” Mukyala Museveni bw’awandiise.
Munnakenya omu ku babadde basuubirwa okusitukira mu mpaka zino Kibiwott Kandie, akutte kyakubiri mu ddakika 58:54 n’aweebwa omudaali gwa siliva ate Amedework Walelegn enzaalwa ya Ethiopia n’akwata ekifo kyakusatu n’eddakika 59:08 n’abuukayo n’omudaali gw’Ekikomo.