Bya Ssemakula John
Kampala
Ebyafulumiziddwa eddwaliro ekkulu e Mulago ku kyaviiriddeko Ssaabasumba Kizito Lwanga okufa biraga nti ono yafudde mutima oluvannyuma lw’omusuwa okuyingiramu akatole k’omusaayi ne gusirika. Ku Lwomukaaga Ssaabasumba Lwanga yasangiddwa ng’afiiridde mu kisenge kye ekyaleeseewo ebigambo ku kituufu ekyamusse. Ku Mmande akulira eby’obulamu mu ssaza ly’Eklezia erya Kampala, Dr. Andrew Ssekitooleko, yategeezezza abakungubazi nti omugenzi yafunye ekizibu ku mutima.
“Okusirika kw’omutima gwe kyavudde ku katole k’omusaayi akayingidde mu gimu ku misuwa ne kalemesa omusaayi okutuuka ku mutima, kino bwekituukawo kitwala eddakiika ssatu ku ttaano ng’omuntu afudde.” Dr. Ssekitooleko bwe yannyonnyodde.
Kino kiggyeewo ebigambo n’okuteereza mbi eby’okufa kwa Ssaabasumba birimu omukono gw’omubi. Okusinziira ku Dr. Ssekitooleko, omulambo gwa Ssaabasumba baagukebedde n’abakugu 4 okuva mu ddwaliro e Mulago era nga waabaddewo abooluganda babiri wamu ne badokita abaalondeddwa Eklezia Katolika.
Okusinziira ku Dr. Ssekitooleko, Ssaabasumba Lwanga abadde n’obulwadde bw’omutima nga bumutawanya. Bino we bijjidde ng’eyavuganya ku bwapulezidenti, Robert Kyagulanyi Ssentamu, yavuddeyo ku Lwomukaaga n’agamba nti enfa ya Ssaabasumba eriko ebibuuzo kuba ku Lwokutaano yalabwako ng’ali bulungi.
Alipoota y’abakungu kati okukkakkanyizza emitima gy’abantu ku kiki ekituufu ekyavuddeko okufa kwa Ssaabasumba.