Bya Ssemakula John
Kampala
Eyeegwanyiza okwesimbawo ku bwapulezidenti mu kalulu ka 2021, John Katumba, naye leero akakasiddwa okwesimbawo oluvannyuma lw’okusasula ssente obukadde 20 eziragirwa mu mateeka.
Eggulo ono Ssentebe w’akakiiko k’ebyokulonda Omulamuzi Simon Byabakama yasoose kugaana kumukakasa, oluvannyuma lw’okukizuula nti ono yabadde talina lisiiti era nga ssente zino yabadde azireese mu mpeke.
Katumba yategeezezza akakiiko k’ebyokulonda nti yalemeseddwa olw’obutaba na ‘TIN Number’ olw’ensonga nti ono abadde yaakamala okusoma era nga talina mulimu.
Ono yalagiddwa ssente okuziteeka mu bbanka n’oluvannyuma adde akakasibwe, era ng’ono olwaleero Omulamuzi Simon Byabakama amukakasizza okuvuganya mu kalulu ka bonna aka 2021.
Katumba bw’abadde ayogerako ne bannamawulire ategeezezza nti, essira agenda kuliteeka ku kulwanyisa ebbula ly’emirimu eriri mu ggwanga, obulyi bw’enguzi wamu n’ekibbattaka ekisusse mu ggwanga.
Katumba agambye nti wadde akyali muto mu myaka, waakufuba okulaba ng’ebyenfuna bya Uganda bitumbuka, waakuzimba enguudo ez’omulembe era afube okulaba ng’ensimbi za Uganda zibeera n’amakulu.