Bya Francis Ndugwa
Lubiri – Mmengo
Katikkiro Charles Peter Mayiga yeebazizza Ssaabasajja Kabaka Ronald Muwenda Mutebi II, olw’okusoosowaza ennyo abavubuka ng’abassa ku mwanjo ekintu ekyali kyakoma okulabwako mu mulembe gwa Ssekabaka Mwanga II.
Ow’omumbuga Mayiga okwogera bino abadde mu maaso ga Nnyinimu ku mukolo gw’amazaalibwa g’Empalabwa ag’emyaka 68 mu Lubiri e Mmengo ku Lw’okuna.
Owek. Mayiga alambuludde nti Omulembe Omutebi gwazzaawo Obwakabaka era gutumbudde abavubuka n’okututumula tekinologiya ekibayambye okwekulaakulanya.
Abasabye okweyambisa Obuwangwa, ennono ne tekinologiya okwekulaakulanya
Mu ngeri ey’enjawulo Katikkiro Mayiga era yeebazizza abantu ababeera ku lusegere lwa Ssemunywa omuli abasiige, abambowa, abeby’okwerinda n’abantu abalala olw’okumulabirira obulungi.
Era Owek. Mayiga ategeezezza nti omukolo guno ogw’amazaalibwa gwa Nnono n’Obuwangwa era neyeebaza Sarah Nalule Kisosonkole ne Ssekabaka Edward Muteesa II olw’okuwa Buganda Omulangira eyalya engoma.
Owek. Mayiga agamba nti amazaalibwa ga Kabaka tegubeera bubeezi mukolo gwakujjukira, wabula wabaawo ensonga enkulu ekwatibwako ng’era mu myaka kkumi egiyise, Omutanda yasiima gibeere ku kulwanyisa endwadde ez’enjawulo.
Asabye abantu okunyweza obuyonjo mu maka gaabwe; okwekebejjesa emibiri, beegendereze byebalya, n’okukola dduyiro, kibayambe okuba abalamu, n’okubaako enkulaakulana gye beetuusaako.
Ye Ssentebe w’olukiiko oluteesiteesi Owek. Daudi Mpanga era minisita avunanyizibwa ku mirimu gy’obwakabaka egy’enkizo, agambye nti omukolo gutambudde bulungi nasaba abantu okuggwayo Beene bw’anaaba asimbula emisinde ku Ssande nga 16/ April/ 2023.
Omukolo guno gwetabiddwako abantu ab’enjawulo omuli; Abamyuka ba Katikkiro, Baminisita, Bakatikkiro abaawummula, Abaami bamasaza, abataka abakulu ab’Obusolya ne bakatikkiro baabwe, Abalangira, Bannaalinya, Abambejja, Bannabyabufuzi n’abantu abalala.
Kinajjukirwa nti ebikujjuko by’amazaalibwa ga Nnamuswa bigenda kukomekkerezebwa n’emisinde mubunabyalo, egigenda okubaawo nga 16 Kafuumulampawu 2023 Lubiri e Mengo.