Bya Ssemakula John
Seattle – Amerika
Mukuumaddamula Charles Peter Mayiga yeebazizza abantu ba Kabaka abawangaalira ebunaayira olw’okuvaayo nebawagira enteekateeka za Buganda ez’enjawulo ezireetebwa okulaakulanya abantu b’Omutanda.
Obubaka buno, Owek. Mayiga abuweeredde mu nsisinkano gyabaddemu n’abantu ba Kabaka abeetabye mu Buganda Bumu 2023 ku wooteri ya Hyatt Regency Hotel e Seattle mu Amerika ku Mmande.
Katikkiro Mayiga abasabye okufisangawo akadde bewummuzeemu wakati mu mirimu emingi gyebasobola basobole okufuna embavu ezibatwala mu maaso.
Ono azzeemu okukikaatiriza ng’ enteekateeka eno bwegendereddwamu okugatta abantu ba Beene abali ebunaayira n’okubayamba okumanya ebikolebwa gavumenti ya Nnyinimu basobole okutambulira awamu ku nsonga ez’enjawulo.
Owek. Mayiga bano asoose kubayitiramu ku bintu ebituukiddwako mu myaka 10 gy’amaze nga akutte Ddamula nalaga nti wabaddewo okugenda mu maaso.
Ku ntandikwa, minisita avunaanyizibwa ku bantu ba Kabaka abawangaalira ebunaayira, Owek. Joseph Kawuki yakiikiridde Owek. Robert Waggwa Nsibirwa nabayitiramu ku mbeera y’ebyenfuna nga bweyimiridde mu Buganda era nabalaga ebituukiddwako awamu newakyali okusomooza.
Ku mukolo guno, bamusaayimuto abawangaalira ebunaayira boolesezza ebitone eby’enjawulo nebyo byebamanyi ku Bwakabaka.
Omukolo guno gwetabiddwako, Omulangira David Kintu Wasajja, Abataka b’Obusolya, ababaka ba Palamenti, Abaami b’Amasaza ag’ebweru awamu n’abantu abalala.