Bya Ronald Mukasa
Kyaddondo-Mmengo
Kamalabyonna Charles Peter Mayiga azzeemu okulabula abantu ba Buganda okwegendereza Bannakigwanyizi abeesomye okunafuya Obwakabaka nga babusaasaanyaako amawulire ag’obulimba.
Obubaka buno Kamalabyonna Mayiga abutisse Minisita wa Gavumenti ez’Ebitundu, Owek. Joseph Kawuki abuwe abantu ba Beene bw’abadde atikkula Oluwalo okuva mu Bannasingo ku Lwokubiri mu Bulange e Mmengo.
Owek. Mayiga bano abasabye bayambeko okumanyisa abantu ba Kabaka ekituufu baleme okuwuddisibwa abeenoonyeza ebyabwe.
Bannabyabufuzi Mukuumaddamula abakubiriza okubeera obumu okusobola okutuusa obuwereza obulungi eri abantu ba kabaka olwo basobole okulaakulana n’okwegobako obwavu.
Ku lulwe, Owek. Kawuki yeebazizza nnyo obukulembeza bwa disitulikiti ye Kiboga olw’enkolagana ennungi n’Obwakabaka ssaako nokuwagira enteekateeka zonna ez’embuga ezigendereddwamu okulaakulanya abantu ba Nnyinimu.
Owek. Kawuki asabye abazadde okukuza obulungi abaana baabwe awatali kubawulamu olw’ekikkula kyabwe basobole okugasa eggwanga.
Omwami wa Ssaabasajja mu Ssaza Ssingo Mukwenda Deo Kagimu akubiriza Bannasingo okusengejja gyebajja amawulire agakwata ku bwakabaka okusobola okwerinda abesomye okubunafuya nga babungeesa engambo kunsonga ezitali zimu .
Ono banna Ssingo abakubiriza okubeera abakozi, nga banyikira mu byebakola saako n’okusomesa abaana baabwe mu masomero amalungi basobole okuvuganya obulungi munsi.
Ye Ssentebe wa disitulikiti ye Kiboga Nsiiro Gerald Kalumba yeebazizza nnyo Beene olw’ enteekateeka z’obwakabaka zagambye nti ziyambye nnyo okutumbula embeera za bantube.
Kalumba era abasa bye okukozesa obulungi ettaka lyabwe okusobola okwekulakulanya nga balima emmwanyi okusobola okufuna ekigulira Magala eddiba.
Ensisinkano eno yetabiddwamu abakulembeze abenjawulo ku mitendera egyenjawulo okubadde n’omubaka omukyala owa disitulikiti ye Kiboga Hon Christine Kaaya Nakimwero era Bannasingo baleese obukadde 23 okuyambako ku mirimu gy’Embuga.