Bya Gladys Nanyombi
Mmengo – Kakeeka
Katikkiro wa Buganda Charles Peter Mayiga, avumiridde abantu abayiwayiwa ssente mu kalulu nti kino kifeebya obuweereza kuba bano bwebatuuka mu bifo balowooza ku kimu kyakununula ssente zabwe.
![](https://gambuuze.ug/wp-content/uploads/2020/10/0c7ae97d-b186-4da3-98ae-eb8d3ce14b35-1024x683.jpg)
“Ababbi, abalyake, abaluvu, abamenyi b’amateeka nabalinga bwebatyo besanga betusinza. Bwebatuuka mu bifo ebyo nabo bongera obulyake, banunule ssente ezo zebagenda basowerera mu bitundu gyebatalina kakwate,” Owek. Mayiga bw’agambye.
Ono bino abyogedde aggalawo omusomo gw’abakiise b’olukiiko lwa Buganda oguyindidde ku ttendekero lya Buganda Royal Institute e Mmengo – Kakeeka ku Mmande.
Katikkiro Mayiga abadde ayogera ku bisomoozo by’omulembe Omutebi, akonye ku by’obufuzi obw’ennono obutondebwawo n’ekigendererwa ky’okunafuya Buganda nategeeza nti kino kigyongera maanyi.
Owek. Mayiga era yenyamidde olw’obwavu obususse mu bantu ba Kabaka nebatuuka n’okulemwa okulwanirira ebitwala eggwanga n’ebitundu byabwe mu maaso.
Ono ategeezezza nti olw’okuba obwavu buyitiridde abantu betunzeeko buli kimu era nga kati balinda abawa ssente nebalyoka bamuwagira wadde nga tabalumirirwa.
Okusinziira ku Katikkiro Mayiga, ekizibu ekirala kiri mu by’obufuzi ebifuuse ebyakirwanire nga abantu batuuka n’okweggwa mu malaka nagamba nti bino tebisobola kuzimba ggwanga.
Katikkiro Mayiga agambye nti omulembe Omutebi okufanana n’emirala gulina ebisomooza naye Buganda n’abantu baayo balina kubeera bagezi okulaba nga babivunuka.
![](https://gambuuze.ug/wp-content/uploads/2020/10/41710249-6aa0-42a3-bf0e-a9ae4e205491-1024x683.jpg)
Alaze nti bagenda kukola kaweefube w’okunyweza n’okutaaasa Nnamulondo era bakole ne kaweefube w’ebyenfuna basobole okuyamba abantu okuva mu bwavu.
Mayiga anyonyodde nti okuva ku bafuzi b’amatwale, wabaddewo enkola ezigendererwa okunafuya Buganda naye mu mirembe gyonna egy’enjawulo abantu mu Buganda bazze banywerera ku Kabaka waabwe.
Ono abawadde amagezi bekuumire ku Kabaka basobole okuwangula ebisomooza.
Owek. Mayiga abakiise abasabye bamanyise abantu ebigenda mu maaso era bakimanye nti ekimu ku bintu byebalina okusoosowaza be bantu era bafube okulaba engeri gyebawuliziganyamu nabo.
Yye Owek. Daudi Mpanga alaze abakiise obukulu bwa Federo era nategeeza nti yegenda okuyamba abantu ba Buganda okwesitula mu by’enfuna era bakulaakulane.
Omu ku boogezi, Ronnie Kiwumulo Mbabaali, alambise abakiise ku mugaso gw’okubeera eky’okulabirako eri bebakulembera kibayambe okukwatagana.
![](https://gambuuze.ug/wp-content/uploads/2020/10/46ac5b4f-181e-4861-ad75-4fcb303bc8cf-1024x683.jpg)
Omusomo guno gwetabiddwako ba minisita ab’enjawulo okuva mu Bwakabaka okuli Owek. Noah Kiyimba, Owek. Patrick Luwaga Mugumbule, Owek. Hajji Ahmed Lwasa wamu n’abakungu okuva mu bitongole by’Obwakabaka.