Bya Gerald Mulindwa
Bulange
Katikkiro wa Buganda, Charles Peter Mayiga, asabye abantu ba Kabaka okwettanira okumanya ebyobulambuzi ebikwata ku buwangwa, basobole okukuuma wamu n’okumanya n’okutegeera ennono yaabwe.
![](https://gambuuze.ug/wp-content/uploads/2021/01/kATIKKIRO-NE-mAYIGA.jpg)
Okusaba kuno Katikkiro Mayiga akukoledde mu Bulange, Olwaleero bw’abadde atongoza bboodi y’ekitongole kya ‘Buganda Heritage and Tourism Board,’ egenda okukulirwa Omuk. Benon Ntambi omutandisi wa Royal Giant High school e Mityana.
“Tetusobola kuba ggwanga nga tetukuuma nnono n’obuwangwa bwaffe, awo tuba twerimba ky’ova olaba bw’obeera omukkiriza, omukatuliki, bakusuubira okugenda mu Eklezia, omusiraamu mu Muzikiti kuba ke kabonero akalaga ky’oli.” Owek. Mayiga bw’agambye.
Owek. Mayiga agambye nti akunze bannayuganda okugondera ekiragiro kya Ssaabasajja Kabaka nga bakuuma ebifo eby’enkizo eby’obuwangwa.
Ono alaze obukulu bw’ebyobulambuzi eri enkulaakulana y’ensi, n’ategeeza nti okunoonyereza kulaga nti eby’obulambuzi byokka biwa abantu abasoba mu bukadde 50 emirimu nsi yonna.
Owek. Mayiga agasseeko nga gavumenti ya Uganda bw’efuna ensimbi eziwera akawumbi kamu n’obukadde lukaaga (1.6bn) okuva mu by’obulambuzi byokka n’asaba bboodi eyambeko Obwakabaka okuyingiza ensimbi.
Mayiga agamba nti eby’obulambuzi y’engeri emu Obwakabaka gye bujja okunywezaamu ebyobuwangwa byayo wamu n’okuwa ekifaananyi ekituufu ku by’obuwangwa n’ennono.
Katikkiro, Minisitule y’ebyobulambuzi awamu ne bboodi eno, agiwadde omulimu okwongera okukuuma, okutaasa wamu n’okutumbula ebyobulambuzi mu Buganda n’okubyagazisa abantu okuli n’abaana abato kuba ebintu ebiri wano si bikolerere.
Katikkiro abasabye bamalirire okuteeka ekiragiro kya Kabaka mu nkola nga batandikawo ekkadiyizo ( ‘Museum’,) basobole okukuuma ebiwandiiko n’ebyafaayo.
Abasabye okulaba nga ebyobulambuzi lye limu ku makubo agalina okuvaamu ensimbi okuyimirizaawo Obwakabaka.
Mu kusooka Kamalabyonna yatongozza omutimbagano gwa Buganda Heritage and Tourism Board (https://bhtb.or.ug nga kw’otadde ne you tube channel era n’aggulawo ne woofiisi omuli ebyobulambuzi bya Buganda ebyenjawulo.
Ate ye Minisita w’ebyobulambuzi n’ennono mu Bwakabaka, Owek. Kyewalabye Male, ategeezezza ng’ekirwadde kya Ssennyiga Corona bwe kyakosa ennyo ebyobulambuzi olw’okuba ensi yonna yali ku muggalo.
Ssentebe wa Bboodi omuggya, Omukungu Benon Ntambi, asiimye Nnamunswa olw’okubalengera n’abawa obuvunaanyizibwa buno era n’awera okubutuukiriza.