Bya Ssemakula John
Bulange – Mmengo
Akakiiko akagenda okutegeka emikolo gy’okujaguza Amazaalibwa ga Ssaabasajja Kabaka Ronald Muwenda Mutebi II, aganaabawo nga 13 April 2023, katongozeddwa.
” Amazaalibwa ga Kabaka gakubeerawo ng’ennaku z’omwezi 13 April nga agenda kuweza emyaka 68 ku lunaku olwo,” Katikkiro Mayiga bw’annyonnyodde.
Katikkiro Mayiga annyonnyodde nti emyaka 68 mitono ku mulembe oguliwo kuba abantu bawangaalira ddala okutuuka ku myaka 90.
Owek. Mayiga annyo annyonnyodde nti okwolesebwa kwebalina kwakuzza Buganda ku ntikko naye kino kisoboka abantu ba Kabaka nga balamu bulungi era nakakasa nti n’omulundi guno omulamwa gukyali gwa kulwanyisa akawuka ka Mukenenya.
Olukiiko lukulirwa Oweek. David F.K. Mpanga, nga luliko: Oweek. Prosperous Nankindu Kavuma; Oweek. Joseph Kawuki; Oweek. Noah Kiyimba, n’abakungu abalala.
Bano beeyamye okutegeka omukolo ogusobola okuggyayo obulungi ekitiibwa ky’ Empologoma.
Omukungu w’ekitongole ky’ ensi yonna ekikola ku kulwanyisa Mukenenya ki UNAIDS, Sarah Nakku ategeezezza nti omulimu munene ogukoleddwa Obwakabaka okulwanyisa ekirwadde kino era nakakasa nti kino kyelaga lwattu mu bibalo.
Emikolo gigenda kuyimbira mu Lubiri lwa Nnyinimu Ssaabasajja Kabaka e Mmengo wansi w’omulamwa gw’okulwanyisa Mukenenya.