Bya Ssemakula John
Nkumba – Busiro
Katikkiro Charles Peter Mayiga agugumbudde gavumenti olw’okulemererwa okusosoowaza ebintu ebikulu ebisinga okusoomoza abantu mu mbalirira yaayo ekintu ekizza enkulaakulana emabega.
Bino Kamalabyonna Mayiga abyogeredde mukitambiro ky’Emmisa mukuziika mutabani w’omugenzi Paul Kawanga Ssemwogerere, Paul Joseph Semakula e Nkumba mu Busiro eyafudde obulwadde bwa kkookolo ku ntandikwa ya wiiki eno.
” Nsaasira nnyo ab’enju olw’okufiirwa omwana ono, ate nga kye baggye bafiirwe mukadde waabwe, Paul Kawanga Ssemwogerere omwezi oguwedde. Tubasabira Omutonzi abagumye. Tusaba Gavumenti, esse nnyo essira ku kutumbula ebyobulamu, bataase abantu. Tekigasa kutwala mulwadde bweru wa ggwanga nga ne wano obusobozi weebuli,” Owek. Mayiga bw’ategeezezza.
Owek. Mayiga asabye gavumenti era eteeke amaanyi mu kutumbula ebyenjigiriza awamu n’ebyokwerinda okusobola okuleetawo enkulaakulana .
Katikkiro awadde ekyokulabirako kyabasawo bagamba nti bano bayita mu mbeera enzibu ddala naddala abajanjaba kkookolo kyokka nebikozesebwa nebyo nebibeera bitono ddala.
Owomumbuga asinzidde wano nasaba abantu okukoppa ebikolwa bya Paul Joseph Semakula ate bibafuukire ekikubagizo kubanga abadde musajja alimu ensa.
Omukolo guno gwatandise n’ ekitambiro ky’emmisa ekikulembeddwamu Ssaabasumba w’essaza ekkulu erya Kampala, Bishop Paul Ssemogerere eyayogedde ku mugenzi ng’abadde omuntu w’abantu atasosola mu langi wadde nga kitaawe yali wa Democratic Party.
Okuziika kuno kwetabiddwako Katikkiro eyawummula Owek. Joseph Mulwanyamuli Ssemwogerere bannabyabufuzi okuli Dr. Kiiza Besigye, Omubaka Muhammad Muwanga Kivumbi, Ssaabawandiisi wa NUP David Lewis Lubongoya, Loodi mmeeya wa Kampala Erias Lukwago banna DP, Owek. Daudi Mpanga, Owek. Joseph Mulwanyammuli Ssemwogerere, Ssebwana Charles Kiberu Kisiriiza nabantu abalala bangi.