Bya Musasi Waffe
Bulange – Mmengo
Katikkiro Charles Peter Mayiga alabudde bannabitone abayimba Enyimba ez’obuwemu n’ekigendrerwa ky’okufuna ettutumu nti bakikomye bunnambiro kubanga basiga ekifaanyi ekibi eri abaana abato nga beerabidde nti ekikula amangu kifa mangu.
Ensisinkano eno eyindidde mu Bulange e Mmengo ku Mmande nga yeetabiddwamu abayimbi ab’enjawulo nebanjulira Katikkiro Mayiga enteekateeka y’ekivvulu mwagenda okujaguliza emyaka 42 nga ayimba.
“Tumwebaza olw’okuzimba obuwangwa, okutumbula olulimi, okusomesa n’okuyigiriza, okuzimba Eggwanga n’okuwummuza abantu ng’ayita mu nnyimba ze. Tuvumirira abayimbi abawemuse ensangi zino olw’okwagala ettutumu ery’amangu mu kifo ky’okukuza ebitone byabwe,” Kamalabyonna Mayiga bw’ategeezezza.
Owek. Mayiga asoose kwambalira abayimbi Gravity omutujju ne Lili pazo abatyoboola olulimi Oluganda nga balukozesa omuwemmula naasaba bano okukikomya mu bwangu.
Mukuumaddammula bwatyo akubiriza abavubuka nga bavumbula ebitone beewale okubikozesa mungeri etyoboola abalala nga balwana okufuna ettutumu.
Ono yeebazizza Lord Fred Ssebata olw’okuyimba Enyimba ezizimba,eziyigiriza n’okusomesa abalala nasaba abalala okumuyigirako.
Owomumbuga mungeri yemu ategezezza nti kikulu nnyo omuntu okugendako mu bazadde be nga aliko olugenda lweyeteekereteekera.
Ye Fred Ssebata ategezezza Katikkiro Mayiga nti amaze emyaka 41 mukisaawe ky’okuyimba kya Kadongo Kamu kwekusalawo okutegeka ekivvulu ekisiima emirimu gye.
Ensisinkano eno yetabiddwamu; Omukubiriza w’Olukiiko lwa Buganda, Owek. Patrick Luwaga Mugumbule, Owek. Noah Kiyimba, ne Owek. Israel Kazibwe Kitooke.
Ekivvulu kya Ssebatta kino kyakubaawo ku Lwokutaano luno ku Serena Hotel mu Kampala.
Ensisinkano eno yetabiddwamu; Omukubiriza w’Olukiiko lwa Buganda Oweek Patrick Luwaga Mugumbule, Oweek Noah Kiyimba, ne Oweek Israel Kazibwe Kitooke.