Bya Ssemakula John
Kampala
Katikkiro Charles Peter Mayiga asabye abavubuka ababeera e Bungereza okutandikawo emirimu egy’enjawulo mu ggwanga lyabwe omuli okuzimba amakolero bayambeko ku bavubuka bannabwe abaasigala e Uganda.
Okusaba kuno katikkiro abyogeredde Bungereza bwabadde asisinkanye abavubuka ababeera e London mu Bungereza ku ssomero lya School of Orient and African Studies.
Owek. Mayiga agamba eno y’engeri yokka gyebagenda okutaasa bavubuka banabwe abataayayiza ku nguudo z’ekibuga olw’ebbula ly’emirimu.
Ono era abasabye okukozesa obukugu bwe bafunye ku ssetendekero ono bekulaakulanya basobole okuleka omukululo.
Katikkiro abakuutidde okusigala nga bawuliziganya n’abenganda zaabwe mu Uganda, kibayambe okuyunga oluganda kuba gye basibuka.
Ensisinkano eno yeetabiddwamu Owek. Joseph Kawuki, Owek. Prosperous Nankindu Kavuma, Omulangira Dawudi Ggolooba; Ssaabalangira Godfrey Musanje Kikulwe, Abataka okubadde Nakigoye, Walusimbi,Ggunju, Kyaddondo, ne Kasujja wamu ne Bassenkulu b’ebitongole by’obwakabaka okubadde Omuk. Simon Kaboggoza – BLB; Omuk. Michael Kawooya Mwebe n’abalala.