Bya Ssemakula John
Kawuku
Katikkiro Charles Peter Mayiga asabye abafumbo naddala abawukanya obuwangwa bulijjo okunywerera ku bumu bwebaba baagala emirembe n’okuwangaaza obufumbo bwabwe.
Entanda eno Katikkiro Mayiga agiweeredde Bunga ku kkanisa ya St. Johns, Church of Uganda mu kugatta James Kulubya Kitamirike ne Tracy Wanyira Mutugi mu bufumbo obutukuvu ku Lwokutaano.
Owek. Mayiga agamba nti singa bafaayo okuwa ekitiibwa obuwangwa bwabuli omu obufumbo kibeera kyangu okutambuza obufumbo n’okwewala ebyo ebisobola okubatabula.
Katikkiro era afalaasidde abafumbo amaka gaabwe okugatambuliza ku musingi ogwobumu nokolagana kiyambko okubunnyweza nokuwangaala.
Ono abasabye okwagala n’okwesiga Katonda mu byonna byebakola kibayambe okukuumagana n’okulaakulana.
Omukolo gwo kugatta abagole gukulembeddwamu Venerable Canon Godfrey BK Buwembo, n’abasaba okuwuliziganya obulungi bwebaba baagala obufumbo okubanyumira.
Buwembo bano abakubiriza obufumbo bwabwe okubwesigamya ku Katonda abalambike ku ngeri yokutambulamu olugendo luno oluggya lwebatandise .
Canon Buwembo asinzidde wano nategeeza nti ng’ ekkanisa ya Uganda tebakkiriza bufumbo bwa kikula kimu, era nasaba abakkiriza obutabwesembereza.
Omukolo guno gwetabiddwako abakungu abenjawulo okuva mu gavumenti eyawakati n’Obwakabaka okubadde Owek. Martin Sseremba Kasekende n’Omukyala n’abakungu abalala.